ەلىمىزدە ايتۋلى كۇن وسىمەن 27-ءشى رەت تويلانادى, - دەپ حابارالايدى Olympic.kz.
حالىقارالىق وليمپيادا كۇنىنە وراي قازاقستان ۇلتتىق وليمپيادالىق كوميتەتى بىرنەشە باعدارلاما ۇيىمداستىرادى. كوروناۆيرۋس پاندەمياسىنا بايلانىستى بارلىق شارا ونلاين فورماتتا وتەدى.
"بيىل بەلگىلى سەبەپتەرگە بايلانىستى وليمپيادا كۇنىن مەرەكەلەۋ ونلاين رەجيمىندە وتەدى. تەك قانا بىزدە ەمەس, بۇكىلالەم بويىنشا مەرەكەنى ونلاين فورماتتا اتاپ وتەدى. وسىعان وراي, قازاقستان ۇوك ەكى اپتالىق ينتەراكتيۆتى ونلاين-مارافون ۇيىمداستىرادى جانە اتالمىش باستامانى بارلىق قازاقستاندىق قولدايدى دەپ سەنەمىز. COVID-19 پاندەمياسى كەزىندە ءبىزدىڭ نەگىزگى مىندەتىمىز – سپورت دەگەننىڭ ءسىز بەن بىزدەن تۇراتىنىن, سالاۋاتتى ءومىر سالتى مەن جارقىن بولاشاق ەكەنىن ەسكە سالۋ. قازىرگى تاڭدا الەم بويىنشا كۇن تارتىبىندە سپورت تۇستاستىعى ماسەلەسى باستى ورىندا تۇر. وليمپيادالىق جانە جوعارى جەتىستىكتەر سپورتتى بۇقارالىق سپورتتان, سونىڭ ىشىندە, بالالار سپورتىنان ءبولىپ جارۋعا بولمايتىنىن ءتۇسىنۋ كەرەك. چەمپيون بولۋ بالالىق شاقتان باستالادى. ءبىز بۇگىن وليمپياداشىلارىمىزبەن بىرگە بولاشاق چەمپيوندارعا كوڭىل بولەمىز", - دەپ اتاپ ءوتتى قازاقستان ۇوك باس حاتشىسى اندرەي كريۋكوۆ.
باس حاتشىنىڭ سوزىنشە, وليمپيادا جەڭىسىنە دەگەن قۇشتارلىق بالالاردىڭ كىشكەنتاي كەزىنەن باستالادى. بالالىق شاقتان جەڭىسكە دەگەن قۇلشىنىس ويانىپ, وليمپياداشىنىڭ نەگىزى قالانادى. ماسەلەن, بارلىق وليمپيادا چەمپيونى نەمەسە جۇلدەگەرلەرىن الىپ قارايتىن بولساق, ولار كىشكەنتاي كەزدەرىنەن سپورتشى بولۋدى, جەڭىسكە جەتۋدى قالاعان. ولاردىڭ بالا ارماندارى ورىندالىپ, ءۇمىت پەن سەنىمى ۇشتاسىپ جەڭىسكە جەتەلەگەن. ەرىنبەي ەڭبەك ەتكەن ساتتەرى تۋرالى ۇنەمى, ۇزدىكسىز ماقتانىشپەن ايتۋعا بولادى.
وليمپيادالىق سپورت تۇرلەرىنەن ۇلتتىق قۇراما كوماندالارىن دايىندايتىن قازاقستان ۇوك وليمپيادا كۇنى تاقىرىبىن وسىعان ارنايدى.
"بالا ارمانى ادامدى ەشقاشان الدامايدى, اداستىرمايدى. كىشكەنتاي كەزىمنەن سپورتشى, سونىڭ ىشىندە جەڭىمپازدار قاتارىنان تابىلعىم كەلەتىن. بالالار اراسىندا الىسىپ ويناپ جۇرگەندە-اق جەڭىلۋ شامىما تيەتىن. اۋلاداعى كەز كەلگەن بيىك تۇعىردى جەڭىس تۇعىرىنا بالاپ, ءوزىمدى كاسىبي سپورتشى رەتىندە ەلەستەتەتىنمىن. وسىلايشا, سپورت - مەنىڭ ءبىر بولشەگىمە اينالدى. مەندەگى كىرشىكسىز سەنىم ومىرىمە جارىق ساۋلە شاشىپ, جول سىلتەپ, ۇلكەن سپورتقا الىپ كەلدى. وسكەندە كىم بولعىڭىز كەلەتىنىن شەشە الماساڭىز, ءبىر ساتكە بالالىق شاعىڭىزعا كوز تاستاپ, ارمانىڭىزعا ەرىك بەرىپ كورىڭىز. ماعان سەنىڭىز, تۇيسىك الدامايدى. وسىنداي بالا ارماننىڭ جەتەگىندە سپورتقا سانالى تۇردە كەلگەنىمدى ەشقاشان جاسىرمايمىن. سوندىقتان, بىزگە قاراپ كىمدە كىم ءومىرىن سپورتپەن بايلانىستىرعىسى كەلسە, مەن ءۇشىن وتە قۋانىشتى جاعداي بولاتىن ەدى", - دەيدى ەلدوس سمەتوۆ.
ء"بىز, وليمپياداشىلار وسكەلەڭ ۇرپاق, جاس سپورتشىلار ءۇشىن ۇلگى ەكەنىمىزدى وتە جاقسى تۇسىنەمىز. وليمپيادا كۇنى - سپورتقا ەندى قادام باسقان جاس بۋىن, جانكۇيەرلەر مەن جاناشىرلارىمىزبەن تىلدەسۋگە تاپتىرماس كۇن. ءبىزدىڭ كەزدەسۋىمىزدەن كەيىن كىشكەنتاي بۇلدىرشەندەردىڭ سپورتقا قىزىعۋشىلىعى ويانىپ, سپورتپەن ءومىرىن بايلانىستىراتىندار سانى ارتا تۇسەدى دەپ ويلايمىن. سەبەبى, سپورت مىقتى بولۋعا, ەڭبەكقور, تاباندى جانە دە ەڭ باستىسى دەنساۋلىعىنىڭ جاقسى بولۋىنا كومەكتەسەدى ەمەس پە؟!" - دەيدى وليمپيادا چەمپيونى دميتري بالاندين.
وليمپيادا كۇنىن تويلاۋ اياسىندا بالالار اراسىندا سۋرەت سالۋ بايقاۋى وتەدى. سونىمەن قاتار, YouTube جەلىسىندە اتاقتى سپورتشىلارمەن ونلاين جاتتىعۋ وتكىزىلەدى. ۇوك پەن يۋنەسكو-نىڭ بىرلەسكەن جوباسى بارىسىندا وليمپيادا چەمپيوندارى مەن ەرەكشە بالالار اراسىندا كەزدەسۋ ۇيىمداستىرۋ دا جوسپارلانعان.
سونىمەن قاتار ءبىز #teamKZ جانكۇيەرلەرىنە الەۋمەتتىك جەلىلەردى مۇقيات قاداعالاپ وتىرۋعا كەڭەس بەرەمىز. وندا ۇوك-تىڭ ەستەلىك سىيلىقتارىن جەڭىپ الۋعا بولاتىن بىرقاتار ۆيكتورينا باستالادى. ۆيكتورينا 23 ماۋسىمعا دەيىن جالعاسادى.
ەلىمىزدىڭ وليمپيادالىق وتباسى اتالعان مەرەكەگە بەلسەندى قاتىسۋعا جانە جاھاندىق وليمپيادالىق قوزعالىسقا قوسىلۋعا شاقىرادى. ءبىز ۇلكەن سپورت ارقاشان كىشكەنتاي جەڭىستەردەن, بولاشاق جاس چەمپيونداردىڭ جەڭىستەرىنەن باستالاتىنىن ۇمىتپاۋىمىز كەرەك.