رەسەي فەدەراتسياسى ياكۋتيا ەلىنىڭ 42 جاستاعى تۇرعىنى يگور دەگەن ازاماتتى تايگانىڭ قاندىاۋىز قوڭىر ايۋى تالاپ, بىراق ول عايىپتان امان قالدى, - دەپ جازادى Egemen.kz
اشۋلى ايۋ بالىقشىنى باس سالىپ جاۋكەمدەي باستاعاندا كەنەت ونىڭ قول تەلەفونى زارلاپ قويا بەرگەن. قىزىق بولعاندا سمارتفوننىڭ دىبىستىق سيگنالىنا كانادانىڭ اتاقتى ءانشىسى جاستين بيبەردىڭ "Baby" ولەڭى قويىلعان ەكەن. كەنەتتەن شىققان بەيمالىم اننەن شوشىعان ايۋ ولجاسىن تاستاي سالىپ, تۇرا قاشىپتى.
وسى وقيعا جايلى بالىقشى: "بۇل ءاندى نەمەرە قىزىم تەلەفونىما جۇكتەپ بەرگەن بولاتىن. ءارى ەستۋ قابىلەتىم ناشارلاعاندىقتان تەلەفوننىڭ دىبىس شىعارۋ جيىلىگىن ەڭ جوعارعى شەككە كوتەرىپ قويعان ەدى. قىزىق بولعاندا بۇل ءان اشۋلى ايۋدى قورقىتادى دەپ كىم ويلاعان. ەگەر ءان ايتىلماسا مەنىڭ امان قالۋىم ەكىتالاي ەدى" دەپتى.
كانادالىق ءانشى جاستين بيبەردىڭ جانكۇيەرلەرى الەمدە جەتىپ ارتىلادى. بىراق ونىڭ ءانى ايۋعا ۇنامايدى ەكەن.