پارلامەنت سەناتىنىڭ دەپۋتاتتارى اسقار شاكىروۆ پەن تولەۋبەك مۇقاشەۆ ەقىۇ پارلامەنتتىك اسسامبلەياسى ۇيىمداستىرعان بەينەكونفەرەنتسياعا قاتىستى. وندا ورتالىق ازيا ەلدەرىنىڭ پارلامەنتشىلەرى اراسىندا كوروناۆيرۋس ىندەتىنە قارسى ءىس-قيمىل, ەكونوميكالىق دامۋ, زاڭنامالىق رەفورمالار جانە پارلامەنتارالىق ۇنقاتىسۋ ماسەلەلەرى بويىنشا پىكىر الماسىلدى.
سەنات توراعاسىنىڭ ورىنباسارى ا.شاكىروۆ ءوز سوزىندە COVID-19-عا قارسى كۇرەس جونىندەگى جان-جاقتى شارالار جانە ونىڭ قازاقستانداعى زارداپتارى تۋرالى ايتىپ بەردى. كەزدەسۋگە قاتىسۋشىلار سونداي-اق قازاقستان رەسپۋبليكاسىنىڭ پرەزيدەنتى جاريالاعان «حالىق ۇنىنە قۇلاق اساتىن مەملەكەت» تۇجىرىمداماسى اياسىنداعى, اتاپ ايتقاندا, بەيبىت جينالىستار مەن ميتينگىلەردى ۇيىمداستىرۋ, سونداي-اق پارتيالىق جۇيەنى نىعايتۋ مەن پارلامەنتتىك وپپوزيتسيا سالاسىندا جۇزەگە اساتىن دەموكراتيالىق وزگەرىستەر تۋرالى حاباردار ەتىلدى.
ەقىۇ پا توراعاسى گەورگي تسەرەتەلي قازاقستانداعى داعدارىسقا قارسى قابىلدانعان شارالارعا وڭ باعا بەردى, سونداي-اق كوروناۆيرۋستىڭ ورشۋىنەن قاتتى زارداپ شەككەن يتاليانىڭ لومبارديا ايماعىنا گۋمانيتارلىق كومەك كورسەتكەنى ءۇشىن العىسىن ءبىلدىردى.
اسسامبلەيا اعىمداعى جىلدىڭ سوڭىنا دەيىن حالىقارالىق قوعامداستىق الدىندا تۇرعان قازىرگى زامانعى قاۋىپ-قاتەرلەردىڭ وزەكتى ماسەلەلەرى بويىنشا بىرقاتار ۇقساس ۆەبينارلار وتكىزۋدى جوسپارلاپ وتىر, دەپ حابارلادى پارلامەنت سەناتىنىڭ ءباسپاسوز قىزمەتى.