قىزىلوردالىق پوليتسەيلەر وتكەن جىلعى مال ۇرلىعىن اشتى

قىزىلوردا وبلىسى اۋماعىندا 8-12 ماۋسىم ارالىعىندا قازاقستان رەسپۋبليكاسى ءىىم-ءنىڭ «ۇرلىقتارعا قارسى ءىس-قيمىل جونىندەگى 2019-2020 جىلدارعا ارنالعان باعدارلاماسىن» ىسكە اسىرۋ باعىتىنداعى ءىس-شارالار جوسپارىنا سايكەس, مال ۇرلىعىنىڭ الدىن الۋ ءۇشىن سونداي ارەكەتكە قاتىسى بار ادامداردى انىقتاۋعا, ولاردى ۇستاۋعا جانە قىلمىستىق جاۋاپكەرشىلىككە تارتۋعا باعىتتالعان «مال ۇرىسى» جەدەل-پروفيلاكتيكالىق ءىس-شاراسى وتكىزىلۋدە.

مىسالى, 8 ماۋسىم كۇنى ءىس-شارا بارىسىندا ارال اۋداندىق پوليتسيا ءبولىمىنىڭ قىزمەتكەرلەرى وتكەن جىلى ورىن العان مال ۇرلىعى قىلمىسىنىڭ 1 دەرەگىن اشتى. اتاپ ايتقاندا, وتكەن جىلدىڭ تامىز ايىندا بەلگىسىز بىرەۋ وسى اۋدان تۇرعىنىنىڭ  قۇنى 150 000 تەڭگە تۇراتىن جىلقىسىن جايىلىمنان ۇرلاپ كەتكەن. ىزدەستىرۋ جۇمىستارىنىڭ ناتيجەسىندە قىلمىستى جاساعان 42 جاستاعى ازامات انىقتالىپ, ول جاساعان قىلمىسىن تولىعىمەن مويىندادى.

اۋماقتىق اۋىل شارۋاشىلىعى قۇرىلىمدارىنان ۆەتەريناريالىق باقىلاۋ ينسپەكتورلارى مەن ۆەتەريناريالىق دارىگەرلەردى تارتا وتىرىپ, تاسىمالداناتىن مالدىڭ يەسىن انىقتاۋ ماقساتىندا مال جانە ەت ونىمدەرىن تاسىمالدايتىن اۆتوكولىكتە ءتيىستى قۇجاتتاردىڭ بولۋىنا تەكسەرۋ جۇمىستارى جۇرگىزىلۋدە.

قۇقىق بۇزۋشىلاردى قر اقبتك-ءنىڭ 406-بابى بويىنشا اكىمشىلىك جاۋاپكەرشىلىككە تارتا وتىرىپ, ەت ونىمدەرى ساتىلاتىن ساۋدا ورىندارىندا, بازارلاردا, ساۋدا ورتالىقتارىندا رەيدتىك ءىس-شارالار ۇيىمداستىرىلۋدا.