تاۋەلسىزدىك العان العاشقى كۇندەردەن باستاپ قازاقستان رەسپۋبليكاسىنىڭ باستى ماقساتتارىنىڭ ءبىرى مەملەكەتتىك رامىزدەرىن دايىنداۋ جانە بەكىتۋ بولدى.
ولاردى دايىنداۋ قازاقستاننىڭ مەملەكەتتىك تاۋەلسىزدىگىنىڭ قالىپتاسۋ تاريحىندا ەرەكشە ورىن الدى. جاڭا سيمۆولداردى جاساۋعا مىڭداعان قازاقستاندىق قاتىستى. «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 جىلى 4 ماۋسىمدا قابىلداندى. وسى زاڭعا سايكەس جىل سايىن 4 ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.
قازاقستان رەسپۋبليكاسىنىڭ مەملەكەتتىك تۋى – ورتاسىندا شۇعىلالى كۇن, ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا ۇلتتىق ورنەك تىك جولاق تۇرىندە ناقىشتالعان. كۇن, ونىڭ شۇعىلاسى, قىران جانە ۇلتتىق ورنەك بەينەسى التىن تۇستەس. قازاقستان رەسپۋبليكاسى مەملەكەتتىك تۋىنىڭ اۆتورى – قازاقستاننىڭ ەڭبەك سىڭىرگەن ونەر قايراتكەرى شاكەن نيازبەكوۆ.
قازاقستان رەسپۋبليكاسىنىڭ مەملەكەتتىك ەلتاڭباسى – دوڭگەلەك ءپىشىندى جانە كوگىلدىر ءتۇستى شاڭىراق تۇرىندە بەينەلەنگەن, شاڭىراقتان شىققان ۋىقتار كۇن ساۋلەسىن ەسكە سالادى. وڭ جاعى مەن سول جاعىندا اڭىزدارداعى قاناتتى پىراقتار بەينەسى ورنالاسقان. جوعارعى بولىگىندە – بەس بۇرىشتى كولەمدى جۇلدىز, ال تومەنگى بولىگىندە «قازاقستان» دەگەن جازۋ بار. قازاقستان رەسپۋبليكاسى مەملەكەتتىك ەلتاڭباسىنىڭ اۆتورلارى – بەلگىلى ساۋلەتشىلەر جانداربەك مالىبەكوۆ پەن شوت-امان ءۋاليحانوۆ.
ەلىمىزدىڭ مەملەكەتتىك گيمنى ەگەمەندى قازاقستاننىڭ تاريحىندا ەكى رەت – 1992 جانە 2006 جىلدارى بەكىتىلدى. رەسپۋبليكا مەملەكەتتىك ەگەمەندىگىن يەلەنگەننەن كەيىن, 1992 جىلى قازاقستان ءانۇرانىنىڭ مۋزىكاسى مەن ماتىنىنە بايقاۋ جاريالاندى. بايقاۋ قورىتىندىسى بويىنشا قازاق كسر گيمنىنىڭ مۋزىكالىق رەداكتسياسىن ساقتاۋ تۋرالى شەشىم قابىلداندى. وسىلايشا تاۋەلسىز قازاقستاننىڭ العاشقى گيمنىنىڭ مۋزىكاسىنىڭ اۆتورلارى مۇقان تولەباەۆ, ەۆگەني برۋسيلوۆسكي جانە لاتيف حاميدي بولدى. سونىمەن قاتار, ۇزدىك ماتىنگە جاريالانعان بايقاۋدا اۆتورلار ۇجىمى, بەلگىلى اقىندار مۇزافار الىمباەۆ, قادىر مىرزاليەۆ, تۇمانباي مولداعاليەۆ جانە جادىرا دارىباەۆا جەڭىپ شىقتى.
2006 جىلى جاڭا مەملەكەتتىك گيمن قابىلداندى. ونىڭ نەگىزى رەتىندە حالىقتىڭ اراسىندا كەڭىنەن تانىمال «مەنىڭ قازاقستانىم» پاتريوتتىق ءانى تاڭداپ الىندى. ول ءاندى ءشامشى قالداياقوۆ 1956 جىلى جۇمەكەن ناجىمەدەنوۆتىڭ سوزىنە جازعان بولاتىن. قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆ انگە مەملەكەتتىك گيمن جوعارى مارتەبەسىن بەرۋ جانە اناعۇرلىم سالتاناتتى شىرقالۋى ءۇشىن مۋزىكالىق تۋىندىنىڭ باستاپقى ءماتىنىن وڭدەدى. قازاقستان پارلامەنتى 2006 جىلى 6 قاڭتاردا پارلامەنت پالاتالارىنىڭ بىرلەسكەن وتىرىسىندا «مەملەكەتتىك رامىزدەر تۋرالى» جارلىققا ءتيىستى تۇزەتۋ ەنگىزىپ, ەلىمىزدىڭ جاڭا مەملەكەتتىك گيمنىن بەكىتتى. بۇرىن «مەنىڭ قازاقستانىم» ءانى رەتىندە تانىمال بولعان قازاقستاننىڭ گيمنى پرەزيدەنت نۇرسۇلتان نازارباەۆتىڭ باستاماسى بويىنشا 2006 جىلى 6 قاڭتاردا ەلىمىزدىڭ پارلامەنتىندە بەكىتىلدى. ءبىرىنشى رەت ول 2006 جىلى 11 قاڭتاردا مەملەكەت باسشىسىنىڭ سالتاناتتى ۇلىقتاۋ راسىمىندە ورىندالدى. ءاننىڭ اۆتورى ءشامشى قالداياقوۆ, ءسوزىن جازعاندار: جۇمەكەن ناجىمەدەنوۆ, نۇرسۇلتان نازارباەۆ.
قازاقستان رەسپۋبليكاسى مەملەكەتتىك رامىزدەرى كۇنىنە وراي قازاقستان رەسپۋبليكاسىنىڭ ۇلتتىق ءارحيۆى قورلارىندا ساقتالاتىن ەگەمەندى قازاقستاننىڭ باستى اتريبۋتتارى – تۋ, ەلتاڭبا, ءانۇراننىڭ قالىپتاسۋ تاريحىنان سىر شەرتەتىن قۇجاتتار توپتاماسى ۇسىنىلادى.
سۋرەتتەر قازاقستان رەسپۋبليكاسىنىڭ ۇلتتىق ءارحيۆى قورىنان