بۇگىن باتىس قازاقستان وبلىسى تاۋلىك قورىتىندىسى بويىنشا ەلىمىزدە كوروناۆيرۋستى ەڭ كوپ جۇقتىرعان وڭىرگە اينالدى. رەسپۋبليكا بويىنشا تىركەلگەن 225 وقيعانىڭ 40-ى – اق جايىق وڭىرىندە انىقتالعان.
كوروناۆيرۋس ينفەكتسياسى انىقتالعان 2 ادام – رەسەي فەدەراتسياسىندا جۇمىس ىستەيتىن اقتوبە جانە باتىس قازاقستان وبلىسىنىڭ تۇرعىندارى. ولار رەسەي فەدەراتسياسىمەن شەكاراداعى «سىرىم» اۆتووتكەلىندەگى سانيتارلىق-كارانتيندىك بەكەت ارقىلى قازاقستان اۋماعىنا وتكەن. سول جەردە ەپيدەميولوگ ماماندار بايلانىسسىز تەرمومەتريا جاساپ, ساۋالناما جۇرگىزگەن. وسى كەزگە دەيىن قالىپتاسقان الگوريتمگە سايكەس, جەدەل جاردەم شاقىرىلىپ, ازاماتتار كارانتيندىك ستاتسيونارعا جاتقىزىلدى. سول جەردە جاسالعان اناليز قورىتىندىسى كوروناۆيرۋس بەلگىسىن انىقتاعان.
دەگەنمەن, اۋرۋدىڭ نەگىزگى كوزى بۇرىن سىرتتان كەلۋشىلەر بولسا, ەندى ىشكى قارىم-قاتىناسقا اۋىپ بارادى. ماسەلەن سوڭعى تاۋلىكتە انىقتالعان 30 ناۋقاس وزدەرىنە دەيىن كوروناۆيرۋس ينفەكتسياسىن جۇقتىرعان ادامدارمەن قارىم-قاتىناستا بولعان. تاعى 5 ادامنىڭ دياگنوزى پروفيلاكتيكالىق ماقساتتا الىنعان زەرتحانالىق سىناما كەزىندە بەلگىلى بولدى.
سونىمەن قاتار, 3 ادام – اتىراۋ وبلىسى تەڭىز كەن ورنىندا ۆاحتالىق ادىسپەن جۇمىس جاسايتىن باتىس قازاقستان وبلىسىنىڭ تۇرعىندارى ەكەن. ولار كورشى ايماقتان كەلۋىنە بايلانىستى كارانتيندىك ستاتسيونارعا جاتقىزىلعان بولاتىن.
«ناۋقاستارمەن قارىم-قاتىناستا بولعان ادامدار انىقتالىپ, بارلىعى مەديتسينالىق باقىلاۋعا الىندى. اۋرۋ وشاقتارىندا دەزينفەكتسيالىق جۇمىستار جۇرگىزىلدى. ەپيدەمياعا قارسى شارالار جالعاسۋدا» دەپ مالىمدەيدى ماماندار.
2 ماۋسىمنىڭ قورىتىندىسى بويىنشا باتىس قازاقستان وبلىسىندا كوروناۆيرۋستى جۇقتىرعان 732 ادام تىركەلدى, ونىڭ ىشىندە 319-ى ىندەتتەن جازىلىپ شىققان.
باتىس قازاقستان