پالاتا توراعاسى ماۋلەن اشىمباەۆ دەنساۋلىق ساقتاۋ مينيسترلىگىنىڭ باسشىلىعىمەن جانە جۇرتشىلىق وكىلدەرىمەن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسىن تالقىلادى, دەپ حابارلادى سەناتتىڭ ءباسپاسوز قىزمەتى.
ءوز سوزىندە سەنات توراعاسى ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا پرەزيدەنتتىڭ دەنساۋلىق ساقتاۋ ماسەلەلەرىنە ەرەكشە نازار اۋدارعانىن اتاپ ءوتتى.
«مەملەكەت باسشىسى مەديتسينالىق ينفراقۇرىلىمدى دامىتۋ, سانيتارلىق-ەپيدەميالىق قىزمەتتى كۇشەيتۋ, دارىگەرلەردىڭ جالاقىسىن ارتتىرۋ جونىندە ناقتى مىندەتتەر قويىپ وتىر. پرەزيدەنتىمىزدىڭ تاپسىرماسىن ورىنداۋ اياسىندا, كودەكس قابىلدانعاننان كەيىن وتاندىق مەديتسيناداعى ماسەلەلەردى وڭ شەشۋگە ءوز ۇلەسىن قوساتىن بولادى», دەدى ماۋلەن اشىمباەۆ.
سونداي-اق توراعا ىندەتپەن كۇرەستە ەرەن ەڭبەگىمەن كوزگە ءتۇسىپ, جانكەشتىلىك تانىتقان ەلىمىزدەگى بارشا مەديتسينا قىزمەتكەرلەرىنە العىسىن ءبىلدىردى.
كودەكس جوباسىن ازىرلەۋشىلەردىڭ ايتۋىنشا, قۇجاتتا قوعام دەنساۋلىعىن قورعاۋدى كۇشەيتۋگە, ۇلتتىڭ دەنساۋلىعىن نىعايتۋعا, مەملەكەت پەن جۇمىس بەرۋشىلەردىڭ جانە ازاماتتاردىڭ ورتاق جاۋاپكەرشىلىگىن كۇشەيتۋگە, تسيفرلى دەنساۋلىق ساقتاۋ سالاسىن دامىتۋعا, مەديتسينا قىزمەتكەرلەرىنىڭ مارتەبەسىن كوتەرۋگە ارنالعان نورمالار بار. سوعان بايلانىستى ىلەسپە تۇزەتۋلەرمەن بىرقاتار زاڭنامالىق اكتىلەرگە وزگەرىستەر ەنگىزىلەدى.
جوبانىڭ قابىلدانۋى مەديتسينالىق قىزمەتتەردىڭ قولجەتىمدىلىگى مەن ساپاسىن قامتاماسىز ەتۋگە, دەنساۋلىق ساقتاۋ سالاسىنداعى قاتىناستاردى ءتيىمدى رەتتەۋگە ىقپال ەتەدى.
سونىمەن قاتار جاڭادان ەنگىزىلەتىن ەرەجەلەر زاڭنامالىق قايشىلىقتاردى ازايتۋعا جانە دەنساۋلىق ساقتاۋدىڭ دەڭگەيىن ەكونوميكالىق ىنتىماقتاستىق جانە دامۋ ۇيىمى ەلدەرىنىڭ ستاندارتتارىنا جاقىنداتۋعا مۇمكىندىك بەرەدى.
بۇدان باسقا, كودەكس جوباسىندا مەديتسينانى دامىتۋدىڭ وزەكتى ماسەلەلەرىن شەشۋدى جانە حالىقتىڭ دەنساۋلىعىن قورعاۋ جۇيەسىن جاقسارتۋ بويىنشا ءتيىمدى شارالاردى كوزدەيتىن تۇزەتۋلەر قامتىلىپ وتىر.
وتىرىسقا سەنات دەپۋتاتتارى, دەنساۋلىق ساقتاۋ ءمينيسترى ەلجان ءبىرتانوۆ, سونداي-اق ساراپشى ماماندار مەن قوعامنىڭ بەلسەندى وكىلدەرى قاتىستى.