1 ماۋسىم – حالىقارالىق بالالاردى قورعاۋ كۇنىنە وراي قىزىلوردا وبلىسى پوليتسيا دەپارتامەنتى «بالالارعا جىلۋ سىيلا» اتتى قايىرىمدىلىق شارا ۇيىمداستىردى. بۇل تۋرالى دەپارتامەنتتىڭ ءباسپاسوز قىزمەتى حابارلادى.
سىر ساقشىلارى كوپسالالى وبلىستىق بالالار اۋرۋحاناسىنىڭ 1-پەدياتريا بولىمىنە باردى. بۇل بولىمدە ەندوكرينولوگيالىق جانە نەۆرولوگيالىق اۋرۋلارمەن اۋىراتىن بالالار ەم قابىلدايدى. جيىرما ادامعا ارنالعان بولىمدە جىلىنا 1500-گە جۋىق بالا ەم الادى.
بالالاردى مەرەكەمەن قۇتتىقتاعان پوليتسەيلەر اۋرۋحانا اسحاناسىنا قاجەتتى قۇرال-جابدىقتاردى سىيعا تارتتى. دەپارتامەنت باسشىسىنىڭ ورىنباسارى پازىلبەك نالىباەۆ پەن ارداگەرلەر كەڭەسىنىڭ توراعاسى سەرىكبول تۇڭعىشباەۆ بالالارعا تاتتىلەر مەن سىيلىقتار تاراتتى.
اۋرۋحانا باسشىلىعى بۇلدىرشىندەرگە مەرەكەلىك كوڭىل كۇي سىيلاعان ءتارتىپ ساقشىلارىنا العىسىن ءبىلدىردى.
قىزىلوردا وبلىسى