كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا سولتۇستىك قازاقستان وبلىسىندا تاعى 5 ادامنىڭ كوروناۆيرۋس ىندەتىن جۇقتىرعانىن حابارلادى.
ۆيرۋستى جۇقتىرعاندار 1972, 1984, 1991 جىلدارى تۋعان ەر ادامدار — رەسەيدىڭ ومبى قالاسىندا ۆاحتالىق ادىسپەن جۇمىس ىستەيتىن قازاقستان ازاماتتارى, سونداي-اق 1988 جىلعى جۇك تاسىمالداۋشى, ول رف رۋبتسوۆسك قالاسىنان كەلگەن. ەر ادامداردا كوروناۆيرۋستىڭ كلينيكالىق بەلگىلەرى بايقالمايدى. ەلگە كەلگەن سوڭ COVID-19-عا تەكسەرىلىپ, كارانتيندىك ستاتسيونارعا جاتقىزىلدى. سونداي-اق پتر تالداۋ ناتيجەلەرى بويىنشا كوروناۆيرۋس ينفەكتسياسىن 1988 جىلى تۋعان ەر ادامنىڭ جۇقتىرعانى انىقتالدى. ول اۋرۋدى جۇقتىرعان ناۋقاسپەن جاقىن قارىم-قاتىناستا بولعان.
COVID-19-دى جۇقتىرعانى انىقتالعاننان كەيىن ناۋقاستار پەتروپاۆل قالالىق اۋرۋحاناسىنىڭ جۇقپالى اۋرۋلار بولىمىنە جاتقىزىلدى. ەپيدەميولوگيالىق تەرگەۋ جۇمىستارى قولعا الىنعان
وتكەن تاۋلىكتەگى جاعداي بويىنشا سقو اۋماعىندا COVID-19 ۆيرۋسىن جۇقتىرعان جالپى 59 ادام تىركەلگەن, ولاردىڭ ىشىندە 35-ءى جازىلىپ شىققان.