قىزىلوردادا بيىل «جۇمىسپەن قامتۋدىڭ 2020-2021 جىلدارعا ارنالعان جول كارتاسى» باعدارلاماسى اياسىندا ءبىراز باستاما جۇزەگە اسادى. بۇل تۋرالى بۇگىن قالالىق ء باسپاسوز ورتالىعىندا وتكەن بريفينگتە قالا اكىمىنىڭ ورىنباسارلارى مەن سالا باسشىلارى ايتىپ ءوتتى.
وبلىس ورتالىعىن اباتتاندىرۋمەن قاتار 200-دەن اسا كوشەگە ورتاشا جانە كۇردەلى جول جوندەۋ جاسالادى. الپىس سەگىز كوشەگە جاياۋ جۇرگىنشىلەر جولى سالىنادى. وتىز ويىن الاڭى سالىنىپ, 70 ايالداما ورناتىلادى, توزىعى جەتكەن اۋىز سۋ جانە كارىز سۋ جەلىلەرى جوندەلەدى.
قىزىلوردا-جەزقازعان تراسساسى بويىنان بوي كوتەرەتىن 600 ورىندىق مەكتەپ قالاداعى ءبىلىم نىساندارىنىڭ سانىن ارتتىرماق. سونىمەن قاتار, 4 مەكتەپ پەن 2 بالاباقشا قايتا جاڭعىرتۋ مەن كۇردەلى جوندەۋ جۇمىستارىنان وتەدى. بۇعان قوسا, 3 مادەنيەت نىسانى جاڭارتىلادى.
بيىل 200-دەن اسا كوشە جوندەلەدى. ولاردىڭ ساپاسىنا باسا ءمان بەرىلەدى. وسى ءۇشىن قالا اكىمىنىڭ تاپسىرماسىمەن ارنايى حالىقتىق باقىلاۋ توبى قۇرىلعان,- دەدى قالا اكىمىنىڭ ورىنباسارى ەرلان بەردىباەۆ.
قالا اكىمىنىڭ تاعى ءبىر ورىنباسارى بەكتاس نۇريدينوۆ جوبا اياسىندا جىل كولەمىندە جۇمىسپەن قامتۋ ورتالىعى ارقىلى 4523 ادام تۇراقتى جۇمىسپەن قامتىلاتىندىعىن اتاپ ءوتتى.
بۇل باعدارلاما اياسىندا جۇمىس ىزدەۋشى ازاماتتار ءۇشىن قالالىق جۇمىسپەن قامتۋ ورتالىعى ءموبيلدى توپ جۇمىسىن ۇيىمداستىرىپ, مەكەنجايلاردا جۇمىسقا ورنالاسۋ جولدارىن ءتۇسىندىرۋ باعىتىندا جۇمىستار جۇرگىزۋدى قولعا العان.