پوليتسيا قىزمەتكەرلەرى 25 مامىردان بەرى «بورىشكەر» ءىس-شاراسىن وتكىزىپ جاتىر. العاشقى ءۇش كۇندە جۇرگىزۋشىلەر تاراپىنان 161 قۇقىق بۇزۋشىلىق جاسالىپتى. سوعان وراي جۇرگىزۋشىلەرگە سالىنعان 1 ميلليون 200 مىڭ تەڭگەدەن استام ايىپپۇل ءوندىرىلىپ وتىر.
– «بورىشكەر» ءىس-شاراسى ايىپپۇلداردى تولەۋدەن جالتارىپ جۇرگەن جۇرگىزۋشىلەرگە قاتىستى پارمەندى جۇمىستاردى ۇيىمداستىرۋ ماقساتىندا قولعا الىندى. اتالعان ءىس-شارا كەزىندە جەدەل باسقارۋ ورتالىعىنداعى بەينەكامەرالاردىڭ جانە «اۆتوۋراگان» جۇيەسىنىڭ كومەگىمەن قالا كوشەلەرىنەن 45 كولىك توقتاتىلدى. بۇل كولىكتەردىڭ جۇرگىزۋشىلەرى 276 رەت اكىمشىلىك قۇقىق بۇزعان. كەيبىرەۋىنىڭ جول قوزعالىسى ەرەجەلەرىن 10-17 رەت بۇزعانى انىقتالدى. الايدا, ولار قۇقىق بۇزۋشىلىق ءۇشىن سالىنعان 2 ميلليون تەڭگەدەن اساتىن ايىپپۇلداردى تولەۋدەن جالتارىپ كەلگەن. ءتارتىپ ساقشىلارى بورىشكەرلەردىڭ كولىكتەرىن ايىپپۇل تۇراعىنا قويىپ, ولارمەن ءتۇسىندىرۋ جۇمىستارىن جۇرگىزدى, - دەپ حابارلادى دەپارتامەنتتىڭ ءباسپاسوز قىزمەتى.