جىل سايىن 25 مامىردا اينالامىز جۇزدەرى بال-بۇل جانىپ, قولدارىنا گۇل ۇستاپ, مەكتەپكە اسىققان وقۋشىلارعا تولىپ كەتۋشى ەدى. سوڭعى قوڭىراۋدان كەيىن مەكتەپ بىتىرگەن تۇلەكتەر يىعىنا اسقان كوك لەنتالارىن شەشپەستەن كوشەدە الشاڭ باسىپ ۇزاق جۇرسە, ۇزدىك وقىعان وقۋشىلار العان گراموتالارىن اتا-اناسىنا جەتكىزۋگە اسىعاتىن.
ال بيىلعى سوڭعى قوڭىراۋ سوعىلمادى. الەمدى الەككە سالعان كوروناۆيرۋس پاندەمياسىنا بايلانىستى بيىلعى سوڭعى قوڭىراۋ ەرەكشە جاعدايدا ءوتتى. بۇل ەل تاريحىندا, ءبىلىم سالاسىندا بۇرىن-سوڭدى بولماعان جاعداي. ءيا, ەلىمىزدىڭ مەكتەپتەرىندەگى سوڭعى قوڭىراۋ شاراسى ونلاين تۇردە وتكىزىلدى.
پرەزيدەنت قاسىم-جومارت توقاەۆ Twitter جەلىسىندەگى پاراقشاسىندا مەكتەپ تۇلەكتەرىن «سوڭعى قوڭىراۋ» كۇنىمەن قۇتتىقتاپ, «اسىل ارماندارىڭىز ورىندالا بەرسىن! بولاشاقتارىڭىز جارقىن بولادى دەپ سەنەمىن! جاس ۇرپاقتى عاجايىپ ءبىلىم الەمىنە جەتەلەيتىن ۇستازدار قاۋىمىنا قاجىرلى ەڭبەكتەرى ءۇشىن العىس ايتامىن!» دەپ, تۇلەكتەرگە ساتتىلىك تىلەپ, ۇستازدارعا ريزاشىلىعىن ءبىلدىردى.
جالپى العاندا بيىلعى وقۋ جىلى 4 ميلليوننان استام وقۋشى مەن ستۋدەنتتىڭ ەسىندە قاشىقتان وقىتۋ فورماتىنا كوشۋمەن ساقتالىپ قالاتىنى ءسوزسىز. ەلىمىزدە 7 412 مەكتەپ بار, وندا 3 349 069 بالا وقيدى. 9 سىنىپ وقۋشىلارىنىڭ سانى – 266 897, 11 سىنىپ تۇلەكتەرىنىڭ سانى – 144 706. ادەتتەگىدەي تۇلەكتەردىڭ سانىنىڭ كوپتىگى جاعىنان تۇركىستان وبلىسى الدىڭعى ورىندا تۇر. بۇل ايماقتا بيىل 24 مىڭنان استام تۇلەك مەكتەپپەن قوش ايتىستى. ال «التىن بەلگىگە» ۇمىتكەرلەر سانى – 8 506. بيىل ۇبت-عا قاتىسۋ بويىنشا رەكوردتىق جاعداي تىركەلىپ, تەستكە 130 مىڭنان استام تۇلەك قاتىسۋعا بەل بايلاپ وتىر. ونىڭ ىشىندە 111 017-ءسى بيىلعى وقۋ جىلىنىڭ مەكتەپ تۇلەگى بولسا, 20 000-نان استامى كوللەدج جانە وتكەن وقۋ جىلدارىنىڭ مەكتەپ تۇلەگى.
كارانتينگە بايلانىستى قازاقستاندىق وقۋشىلار اتتەستاتىن 3-4 ماۋسىمدا اشىق الاڭدا الادى. ونىڭ دا ءوز ءتارتىبى بار.
دەگەنمەندە بۇل جاعداي وقۋشىلاردىڭ دا, ۇستازداردىڭ دا ساعىن سىندىرمايدى, رۋحىن تۇسىرمەيدى. قاشىقتان وقىتۋ مەن سوڭعى قوڭىراۋدى ونلاين تۇردە وتكىزۋ قيىن ساتتە قولعا الىنعان ۋاقىتشا شارالار ەكەنىن ەل جاقسى تۇسىنەدى. ءبىز كارانتين كەزىندە تەمىردەي ءتارتىپتى ساقتاۋدىڭ ارقاسىندا قيىندىقتى جەڭەمىز.
بۇل جاعداي اسىرەسە, مەكتەپ ءبىتىرۋشى تۇلەكتەردىڭ اسىل ارمانىنا, الداعى جوسپارىنا, جارقىن بولاشاعىنا ەشقانداي كەرى اسەر ەتپەۋى ءتيىس. بيىلعى مەكتەپ بىتىرۋشىلەر الەم تاريحىنداعى ەرەكشە تۇلەكتەر. ولاردىڭ وقۋعا, عىلىم-بىلىمگە دەگەن تاۋداي تالاپتارىنا ەشقانداي دا قيىندىق قارسى تۇرا المايتىنى انىق. ەندەشە, ارمان قۋعان تۇلەكتەرىمىزدىڭ الار اسۋى بيىك بولسىن.