حالىقارالىق تۇركى اكادەمياسىنىڭ 10 جىلدىق مەرەيتويىنا وراي موڭعوليانىڭ تۇڭعىش پرەزيدەنتى, اكادەميك پ.وچيرباتتان جانە ماجارستان ۇلتتىق اسسامبلەياسىنىڭ ۆيتسە-پرەزيدەنتى, ايگىلى اقىن شاندور لەجاكتان اكادەميا باسشىسى دارحان قىدىرالىنىڭ اتىنا قۇتتىقتاۋ حاتتار ءتۇستى. بۇل تۋرالى اتالعان ۇيىمنىڭ رەسمي سايتى حابارلادى.
اكادەميك پ.وچيربات ءوزىنىڭ قۇتتىقتاۋ حاتىندا اكادەميا باسشىسىن مەرەيلى مەجەمەن قۇتتىقتاپ, كوشپەندىلەرىنىڭ تاريحى مەن مادەنيەتىن زەرتتەۋگە قوماقتى ۇلەس قوسىپ وتىرعانىنا ريزاشىلىعىن بىلدىرگەن. سونداي-اق ول ءوز حاتىندا: ء«ارى قاراي ءسىزدىڭ قولداۋىڭىزبەن ەكى ەل عالىمدارىنىڭ بىرلەسكەن زەرتتەۋلەرىنىڭ قارقىنى ارتادى دەپ كامىل سەنەمىن. سونىمەن بىرگە ەلدەرىمىزدىڭ اۋماعىنداعى ورتاق تاريحي-مادەني مۇرالاردى زەرتتەۋ جۇمىستارىنا ساتتىلىك تىلەيمىن» دەگەن.
ءوز كەزەگىندە شاندور لەجاك: «تۇركى اكادەمياسى بۇگىندە تۇركى مادەنيەتى مەن داستۇرلەرىن ساقتاۋدا, بۇكىل الەمدە تۇركولوگيانى دامىتۋدا جەتەكشى ءرول اتقارىپ كەلەدى. بۇل قۇرىلىم يدەياسىنىڭ ومىرشەڭدىگىن كورسەتەتىن وتە ماڭىزدى ناتيجە.
ماجارستاننىڭ اكادەميامەن بايقاۋشى رەتىندە ىنتىماقتاسىپ جاتقانىنا ەرەكشە قۋانىشتىمىن.
مەن جەكە ءوزىم جانە ءسىز ارقىلى بۇكىل حالىقارالىق تۇركى اكادەمياسىنا تۇركى وركەنيەتىن ساقتاۋ مەن دامىتۋدا جاڭا تابىستار تىلەيمىن» دەپ يگى تىلەگىن بىلدىرگەن.