بۇگىن سوڭعى قوڭىراۋ ونلاين ءوتتى

جيىنعا قاتىسۋشى اتا-انالار, ۇستازدار جانە مەكتەپ ءبىتىرۋشى تۇلەكتەردى نازارباەۆ زياتكەرلىك مەكتەپتەرى»  دببۇ باسقارما ءتورايىمى كۇلاش شامشيدينوۆا قۇتتىقتادى.

ء«بىلىم سالاسىندا تەرەڭنەن تامىر تارتاتىن, ۇرپاقتار ساباقتاستىعىنىڭ التىن ارقاۋى, اكادەميالىق ەرەكشە ءداستۇرىمىز «سوڭعى قوڭىراۋ» مەرەكەسىن مەكتەپ قاۋىمداستىعى, اتا-انالار ىزگى نيەتپەن, ۇكىلى ۇمىتپەن كۇتەتىنىمىز راس. وكىنىشكە قاراي, بيىل «سوڭعى قوڭىراۋ» مەيرامى ادەتتەن تىس جاعدايعا تۇسپا-تۇس كەلدى. بارلىق الەم ەلدەرىمەن بىرگە پاندەمياعا اينالعان كوروناۆيرۋستىڭ سالدارىنان كۇردەلى سىناقتى ءبىز دە باستان وتكەرىپ جاتىرمىز. وسى  سىن ساعاتتا اسقان جاۋاپكەرشىلىكپەن ونلاين ءبىلىم بەرۋدە ساپالى ەڭبەك ەتكەن بارلىق ۇستازدارىمىزعا, مەكتەپ باسشىلارىنا, IT-ماماندارعا   ريزاشىلىعىمدى بىلدىرەمىن», - دەدى ول.

كۇلاش نوعاتايقىزىنىڭ ايتۋىنشا, كۇرمەۋى كوپ, الدىن الا بولجاۋى مۇمكىن ەمەس كۇردەلى كەزەڭدە دە ءبىلىم بەرۋ سالاسى ءوز قىزمەتىن توقتاتقان جوق. كارانتين ۋاقىتىنا تۇسپا-تۇس كەلگەن 4-ءشى توقساندا زياتكەر ۇستازدار 251 509 ونلاين ساباق, 75 686 كونسۋلتاتسيا وتكىزگەن.

بيىلعى وقۋ جىلىندا نازارباەۆ زياتكەرلىك مەكتەپتەرىنىڭ  وقۋشىلارى 81 ونەرتابىس پاتەنتى مەن اۆتورلىق قۇقىق يەگەرى اتانعان. 33 وقۋشى زەرتتەۋ جوبالارى ءۇشىن ارنايى قارجىلاي گرانتتاردى ۇتىپ, 195 وقۋشى ءتۇرلى دەڭگەيدەگى ءپان وليمپيادالارى مەن عىلىمي جارىستاردىڭ جەڭىمپازدارى اتانعان. سونداي-اق 402 وقۋشى الەمنىڭ ۇزدىك ۋنيۆەرسيتەتتەرى – نازارباەۆ ۋنيۆەرسيتەتى, گارۆارد, Upen, ستەنفورد  جانە QST رەيتينگىنىڭ العاشقى جۇزدىگىنە كىرەتىن باسقا ۋنيۆەرسيتەتتەردىڭ ءبىلىم گرانتتارىن يەلەنىپ وتىر. دارىندى جاستاردى سوڭعى قوڭىراۋ مەرەكەسىمەن الەمگە تانىمال ءانشى, ەل ماقتانىشى ديماش قۇدايبەرگەن دە قۇتتىقتاپ, لەبىز-تىلەگىن ارنادى.

«قۇرمەتتى نازارباەۆ زياتكەرلىك مەكتەپتەرىنىڭ جارقىن بولاشاققا كەمەل قادام باسقالى جاتقان مەكتەپ ءبىتىرۋشى تۇلەكتەرى, سىزدەرگە شىن جۇرەكتەن مول باقىت, قاجىماس قايرات تىلەيمىن. كوزدەگەن ماقساتتارىڭىزعا جەتىپ, ەلىمىزدىڭ ەرتەڭى ءۇشىن تالماي, تىنباي ەڭبەك ەتىپ, ەلىمىزدىڭ تۇعىرىن بيىك-بيىك بەلەستەردەن كورسەتەسىزدەر دەگەن ۇمىتتەمىن. بارلىق ارمان-ماقساتتارىڭىزعا جەتە بەرىڭىزدەر», - دەدى ديماش قۇدايبەرگەن.

الماتى قالاسى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ ونلاين فورماتىنداعى سوڭعى قوڭىراۋ شاراسى وقۋ ورداسىنىڭ ديرەكتورى جۇلدىز دوسبەرگەنقىزىنىڭ لەبىزىمەن جالعاستى. 12 جىلدىق وقۋدى ءتامامداپ, جاڭا كەزەڭگە قادام باسقان تۇلەكتەرگە مەكتەپ باسشىسى اق جول تىلەدى.

«وسىدان التى جىل بۇرىن ينتەللەكتۋالدى مەكتەپتىڭ تابالدىرىعىن جاڭا اتتاپ, جەتىنشى سىنىپقا قابىلداندىڭىزدار. بۇگىن ەلىمىزدىڭ باسەكەگە قابىلەتتى, وزىق ويلى جاستارىنا اينالىپ, التىن ۇيامەن قوشتاسقالى وتىرسىزدار. زور مۇمكىندىكتەرگە جول اشقان سىزدەرمەن ءاردايىم ماقتانامىز! كوز الدىمىزدا ءوسىپ-جەتىلگەن سىزدەردىڭ ءار جەڭىس-جەتىستىكتەرىڭىز ءبىز ءۇشىن قۇندى. اتا-انالار تاراپىنان ەلىمىزدىڭ ءبىلىم سالاسىندا وسى ۋاقىتقا دەيىن ورىن العان وڭ ناتيجەلەرى ءۇشىن العىس ەستىپ, ەرەكشە قۋانىشقا بولەنىپ وتىرمىز. ول دا بولسا, ورتا ءبىلىم بەرۋ جۇيەسىنىڭ ەتالونىنا اينالعان زياتكەرلىك مەكتەپتەر جۇيەسىن قالىپتاستىرعان, وسى جولداعى ءسىز بەن بىزگە قولداۋ تانىتقان تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆتىڭ ارقاسى. ەندەشە, زياتكەرلىك مەكتەپ قابىرعاسىندا سۋسىنداعان ءبىلىم-تاجىريبە ومىرلىك ازىق بولارىنا ءۇمىت بىلدىرەمىز. وقۋدا تابىستى بولىپ, ومىردە ءوز ورىندارىڭىزدى تابۋلارىڭىزعا ءاردايىم تىلەكشىمىز», - دەدى جۇلدىز دوسبەرگەنقىزى.

جاڭا ومىرگە قادام باسقان شاكىرتتەرىنە ىستىق ىقىلاس-پەيىلىن اق جۇرەكتى ۇستازدارى دا جەتكىزىپ, ارنايى ۆيدەو-قۇتتىقتاۋ جولداعان. ءوز كەزەگىندە, ۇستازدىق ۇلى قىزمەتتى اتقارعاندار مەن مەكتەپتى ابىرويمەن اياقتاعان تۇلەكتەرگە اتا-انالار كوميتەتىنىڭ ءتورايىمى الما سالاماتقىزى دا العىس-تىلەگىن ارنادى.