باتىس قازاقستاندا بالاباقشا قىزمەتكەرىنەن كوروناۆيرۋس تابىلدى

باتىس قازاقستان وبلىسىندا اۋماعىندا سەنبى كۇنى – 16, جەكسەنبى كۇنى – 24 ادام كوروناۆيرۋس جۇقتىرىپ, وڭىردە COVID-19 ۆيرۋسىن جۇقتىرعانداردىڭ سانى 414-كە جەتتى. ىندەتتىڭ 93 وشاعى تىركەلگەن.

– كوروناۆيرۋس 100 مىڭ تۇرعىنعا شاققاندا 63,2 ادامدى قۇرادى. 14 جاسقا دەيىنگى بالالار اراسىندا 15 جاعداي تىركەلدى. وبلىستىڭ وڭىرلەرىن جىكتەسەك, اقجايىق اۋدانىندا – 5, ءبورلى اۋدانىندا – 7, جانىبەك اۋدانىندا – 2, بايتەرەكتە – 5, سىرىم اۋدانىندا – 5, تاسقالادا – 11, تەرەكتىدە – 2, ورال قالاسىندا – 377 ناۋقاس تىركەلىپ وتىر, - دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.

سوڭعى كۇندەرى وڭىردە ۆيرۋستى قارىم-قاتىناستان جۇقتىرىپ العاندار كوبەيىپ بارادى. كۇنى بۇگىن ولاردىڭ سانى – 162-گە جەتتى. سونىڭ ىشىندە مەديتسينا قىزمەتكەرلەرى – 55 ادام, 9-ى سول سالانىڭ قاراپايىم ماماندارى. اۋرۋ جۇقتىرعانداردىڭ ىشىندە 5 پوليتسيا قىزمەتكەرى, 2 بالاباقشا, 2 ءبىلىم بەرۋ ءبولىمى, 2 وقۋ ورتالىعى, 1 بلوكپوست قىزمەتكەرى, 1 مەملەكەتتىك كىرىس دەپارتامەنتى قىزمەتكەرى بار. تاعى 85 ادام اۋرۋدى ءۇي وشاعىنان جۇقتىرعان.

جوعارىدا ايتىلعان اۋرۋدىڭ 93 وشاعىندا ناۋقاستار 1115 اداممەن قارىم-قاتىناستا بولعانى انىقتالدى. ونىڭ ىشىندە 597 ادام جاقىن بايلانىستا بولعان. بۇگىندە ينفەكتسيالىق, پروۆيزورلىق جانە كارانتيندىك ستاتسيونارلاردا – 342 ادام, ءۇي وقشاۋلاۋىندا – 1134 ادام دارىگەرلەر باقىلاۋىندا.

بۇدان بۇرىن ايتقانىمىزداي, ورال قالاسىنداعى بارلىق بالاباقشا ۋاقىتشا جابىلدى. بۇعان سەبەپ – سوڭعى ەكى كۇندە 2 بالاباقشادا ەكى قىزمەتكەردەن كوروناۆيرۋس جۇقپاسى انىقتالعان. ول ناۋقاستار COVID-19 ۆيرۋسى انىقتالعانعا دەيىن قالاداعى №2, 3, 4, 5 ەمحانالارعا بارىپ, دارىگەرلەرگە قارالىپ ءجۇرىپتى. سوندىقتان وبلىستىق مەملەكەتتىك باس سانيتارلىق دارىگەر بۇل ەمحانالاردىڭ قىزمەتىن ۋاقىتشا توقتاتتى. قازىر بۇل جەردە ناۋقاسپەن قارىم-قاتىناستا بولعان قىزمەتكەرلەر تۇگەل تەكسەرىلىپ, دەزينفەكتسيا شارالارى جاسالۋدا. بىراق «جەدەل جاردەم» قىزمەتىنىڭ جۇمىسى توقتامايدى.

- ەگەر قالا تۇرعىندارىنىڭ بويىندا كوروناۆيرۋس بەلگىلەرىنە ۇقساس بەلگىلەرى بولسا, قىزۋى كوتەرىلىپ, جوتەل باستالسا, ەمحاناعا كەلمەسىن, «جەدەل جاردەم» قىزمەتىن ۇيگە شاقىرۋىن سۇرايمىز,- دەدى نۇرلىبەك ەرمەك ۇلى.

ورال قالاسىنان ەڭ شالعاي جاتقان جانىبەك اۋدانىندا دا سوڭعى كۇندەرى ەكى ناۋقاس تىركەلدى. ولاردىڭ ءبىرى – اتىراۋ وبلىسىنداعى تەڭىز كەنىشىندە ۆاحتالىق ادىسپەن قىزمەت ەتەتىن جۇمىسشى بولسا, ەكىنشىسى اۋىلدا ازىق-ت ۇلىك دۇكەنىن ۇستاپ, ورال قالاسىنا تاۋار اكەلۋگە بارىپ-كەلىپ جۇرگەن جەكە كاسىپكەر بولىپ شىقتى. قازىر ناۋقاستار تۇراتىن بورسى جانە قامىستى اۋىلدارىندا كارانتين شەكتەۋلەرى ەنگىزىلەدى.

باتىس قازاقستان