رەسەي فەدەراتسياسىنا قاراستى چەشەنستان رەسپۋبليكاسىنىڭ پرەزيدەنتى رامزان قادىروۆ كەشە كوروناۆيرۋس جۇقتىرۋى مۇمكىن دەگەن كۇدىكپەن مەديتسينالىق تىكۇشاقپەن ماسكەۋگە جەتكىزىلىپ, اۋرۋحاناعا جاتقىزىلدى. ويتكەنى, ونىڭ سىرقات سيپاتى ىندەتكە تاپ بولعان اۋرۋلارعا ۇقسايتىنى جايلى ايتىلۋدا. بۇل تۋرالى BBC كورپوراتسياسىنىڭ ورىس تىلىندەگى قىزمەتى حابارلادى.
جوعارىداعى مالىمەتتى باسشىلىققا العان وزگە دە رەسەيلىك اقپارات قۇرالدارى قادىروۆتىڭ ىندەت جۇقتىرۋى مۇمكىن ەكەنىن جاسىرمايدى. ويتكەنى, بۇل دەرت بۇعان دەيىن رف ۇكىمەت باسشىسى ميحايل ميشۋستين, مادەنيەت ءمينيسترى ولگا ليۋبيموۆا, پرەزيدەنتتىڭ ءباسپاسوز حاتشىسى دميتري پەسكوۆ قاتارلى لاۋازىم يەلەرىن الىپ ۇرعان بولاتىن.
قازىرگى تاڭدا چەشەنستاندا ىندەتكە تاپ بولعاندارى سانى 1000 ادامنان اسىپ, دەرتتەن ساۋىققاندار 600 ادامدى قۇراسا, ال كوز جۇمعاندار سانى – 11.
بيىل 43 جاسقا تولعان رامزان قادىروۆ 2004 جىلى اكەسى ولگەن سوڭ ونىڭ ورنىنا تاققا جايعاسقان ەدى. سوڭعى كەزدەرى بۇل جىگىتتىڭ دەنساۋلىعى سىر بەرىپ جۇرگەنى جايلى بەيرەسمي اقپارات تاراعان بولاتىن.
ينتەرفاكس, تاسس جانە ريا نوۆوستي بۇل اقپاراتتىڭ ءالى دە رەسمي راستالماعانىن ايتادى. اقپارات قۇرالدارى دەرەككوز رەتىندە ماسكەۋدىڭ مەديتسينا سالاسىنداعى قىزمەتكەرىن كورسەتكەن.