اتىراۋ قالاسىندا كەشە تۇستە ۇيىنەن شىعىپ كەتىپ, قايتا ورالماعان 1.5 جاسار بالانى ىزدەۋگە 50 ۆولونتەر, 50 سارباز بەن 400-گە جۋىق ەرىكتى كومەككە كەلدى.
پوليتسيا قىزمەتكەرلەرى كەشەدەن بەرى جوعالعان بالانى ىزدەستىرىپ جاتىر. كەشە كەشكىسىن بالاقايدى ىزدەستىرۋگە 50 ۆولونتەر مەن 50 سارباز جۇمىلدىرىلعان ەدى. ولار تۇنىمەن جاۋعان جاڭبىرعا قاراماي, بالانى ىزدەۋدى توقتاتپادى.
– بۇگىن, 21 مامىردا جەرگىلىكتى ۋاقىتپەن تاڭعى ساعات 6:30-دا كومەككە 400-گە جۋىق ەرىكتى كومەككە كەلدى. سونداي-اق ىزدەستىرۋ جۇمىسىنا ۇلتتىق ۇلاننىڭ 50 ساربازى, پوليتسيانىڭ 100-دەن استام قىزمەتكەرى, 50 ۆولونتەر جۇمىلدىرىلدى. ولار «جۇلدىز» شاعىناۋدانىنداعى 51 كوشەنى جان-جاقتى تەكسەرۋگە كىرىستى. پوليتسيا قىزمەتكەرلەرى جەدەل ىزدەستىرۋدىڭ وزگە دە نۇسقالارىن قولعا الدى. شاعىناۋدان اۋماعىنداعى كاناليزاتسيالىق قۇدىقتار, ماڭىنداعى بارلىق نىساندار تەكسەرىلىپ جاتىر, - دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.