قان قۇيۋ ارقىلى اۋرۋدى جەڭبەك

مامانداردىڭ ايتۋىنشا, كوروناۆيرۋستى جەڭىپ شىققان ادامداردىڭ قانىندا وعان قارسى تۇراتىن انتيدەنە پايدا بولادى. بۇل قانداعى پلازمادان الىنادى. ونى جاڭادان اۋرۋ جۇقتىرعان پاتسيەنتكە قۇيۋ ارقىلى, دەرتىنەن ايىق­تى­رۋعا مۇمكىندىك بار. بۇعان دەيىن دە الەمدە جۇقپالى اۋرۋلاردى ەمدەۋدە وسى پلازما قۇيۋ ەڭ ءتيىمدى ءتاسىل رەتىندە قول­دانىلىپ كەلگەن. بۇل تاجىريبەنى بۇ­گىن­دە باتىس ەلدەرى, قىتاي مەن رەسەي دە كو­روناۆيرۋسپەن كۇرەستە كادەگە جاراتا باس­تاعان-دى. اتالعان ءادىستى قولدانۋ ءۇشىن دەنساۋلىق ساقتاۋ مينيسترلىگىنىڭ ترانس­فۋزيولوگيا عىلىمي-وندىرىستىك ورتا­لىعى COVID-19-دان جازىلىپ شىق­قان ادامداردىڭ قانىنان پلازما دايار­لاۋدى باستادى. وتكەن اپتادا نۇر-سۇل­تان قالاسىنداعى كوروناۆيرۋسقا شال­دىعىپ, جازىلىپ شىققان ەكى پاتسي­ەن­ت قان ورتالىعىنا بارىپ قان تاپسىر­دى.

ترانسفۋزيولوگيا عىلىمي-وندى­رىس­تىك ورتالىعىنىڭ ديرەكتورى ءسانيا ءابدى­راحمانوۆانىڭ ايتۋىنشا, قان قاتتى اۋىرعان كىسىلەردەن الىنۋدا. ويتكەنى وسىعان دەيىن قان تاپسىرعان ەمدەلۋشىلەردە اۋرۋ جەڭىل وتكەندىكتەن ولاردىڭ پلازماسىنان ۆيرۋسقا قارسى انتيدەنە تابىلماعان كورىنەدى. «بۇگىن قان تاپسىرعان كىسىلەر ناۋرىزدىڭ باسى مەن ورتا شەنىندە اۋىرا باستادى. جاع­داي­لارى ناشار بولعان ەدى. اۋرۋ­حا­نادان ءساۋىردىڭ ورتاسىندا عانا جازىلىپ شىقتى. وسىدان سوڭ ولار 21 كۇن ءۇي كارانتينىندە بولدى. ياعني دەرتتەن تو­لىق ايىعۋ ءۇشىن ءبىر جارىم ايداي ۋاقىت قاجەت», دەيدى ول.

قان تاپسىرۋعا كەلگەن ەكى پاتسيەنت تە ۆيرۋس جۇقتىرعان سوڭ قاتتى قي­نالعان. ءبىرى مەديتسينا سالاسىنىڭ قىز­مەت­كەرى. پلازمانىڭ ناۋقاسقا قانشا­لىقتى كومەگى تيەتىنىن جاقسى بى­لە­دى. سون­دىق­تان دا اۋرۋدان جازىلا سالىس­ىمەن دونور بولۋعا بەل بۋعان.

ورتالىق ماماندارىنىڭ ايتۋىنشا, قان تاپسىرعاندارعا 7 ايلىق ەسەپتىك كور­سەتكىش (19 مىڭ تەڭگە شاماسىندا) سىياقى دا بەرىلەدى.