تسيفرلاندىرۋدىڭ قىزمەت كورسەتۋ ساپاسى ارتا تۇسەدى

مەملەكەتتىك قىزمەت كورسەتۋ اگەنتتىگىندەگى وسى جانە باسقا جاڭالىقتار تۋرالى جۋرناليستەرگە اگەنتتىكتىڭ وبلىستىق دەپارتامەنتىنىڭ باسشىسى ەلەنا ستەپانەنكو مەن كورپوراتسيانىڭ وبلىستىق فيليالىنىڭ ديرەكتورى ەركىن جۇماباي ايتىپ بەردى. 

قازىر سولتۇستىكقازاقستاندىقتارعا ەلەكتروندى فورماداعى مەملەكەتتىك قىزمەت كورسەتۋ ەسەلەپ ارتقان. ەگەر 2016 جىلى ول بارلىق قىزمەتتىڭ 19,9% قۇراعان بولسا بيىلعى جىلدىڭ ءبىرىنشى توقسانىندا ونىڭ ۇلەسى 85,4% جەتتى. ارينە, بۇعان حالىقتىڭ كارانتين رەجىمىندە بولىپ, ۇيدەن شىعا الماعاندىعى دا اسەر ەتتى. الايدا ءوسىمنىڭ ەسەلەپ ارتقانى كورىنىپ تۇر. «قازىر حقكو-لاردا بارلىق قىزمەتتىڭ 97 ءتۇرىن «ەلەكتروندى وكىمەت» پورتالىنا الدىن الا تاپسىرىس بەرۋ ارقىلى الۋعا بولادى», دەيدى ەركىن جۇماباي.

ءتىپتى مەملەكەتتىك قىزمەتتەردىڭ كوپتەگەن ءتۇرىن تەك قانا ەلەكتروندى فورماتپەن عانا الۋعا بولادى ەكەن. بۇگىنگى تاڭدا «egov.kz» پورتالىندا 567 ءتۇرلى, ال ونىڭ ءموبيلدى قوسىمشاسىندا 64 ءتۇرلى قىزمەتتەر الۋعا بولادى. ال 92 ءتۇرلى قىزمەتتى سمس-پەن دە الۋعا بولاتىن كورىنەدى.

مەملەكەتتىك قىزمەتتەردى تسيفرلاندىرۋ پروتسەسىنىڭ وتپەلى كەزەڭىندە مەملەكەتتىك قىزمەت اگەنتتىگىنىڭ دەپارتامەنتى مەملەكەتتىك ورگاندارمەن بىرلەسە وتىرىپ, وزىنە ءوزى قىزمەت كورسەتۋ سەكتورلارىنىڭ اشىلۋىنا جاعداي تۋعىزدى. ارينە, قىزمەت كورسەتۋ فورمالارى ءارتۇرلى بولعانىمەن ولاردىڭ ساپاسىنىڭ جوعارى بولۋى ۇنەمى ەستە بولادى. وعان Digital agent ءموبيلدى قوسىمشاسى ارقىلى مونيتوريگ جاسالادى. قىزمەت الۋشى ازاماتتار وندا مەملەكەتتىك قىزمەت كورسەتۋ ساپاسىنا 5 بالدىق جۇيە بويىنشا باعا بەرە الادى, سونىمەن قاتار ۇسىنىس-پىكىرلەرىن دە قالدىرىپ كەتەدى.

سولتۇستىك قازاقستان وبلىسى