شەتەلدىكتەردىڭ قازاقستاندا بولۋ مەرزىمىنىڭ ءوز ءتارتىبى بار. الايدا, كەيبىر شەتەلدىكتەر مۇنى ەسكەرىپ ءجۇر مە؟
اتىراۋ وبلىستىق پوليتسيا دەپارتامەنتىنىڭ قىزمەتكەرلەرى 12 مامىردان بەرى «قاۋىپسىز قالا» جەدەل-الدىن الۋ ءىس-شاراسىن وتكىزىپ جاتىر. ءىس-شارانىڭ ماقساتى –قوعامدىق ورىندارداعى, كوشەلەردەگى قىلمىستار مەن قۇقىقبۇزۋشىلاردى, زاڭسىز كەلۋشىلەردى انىقتاۋ.
–پوليتسيا قىزمەتكەرلەرى العاشقى كۇنى بالىقشى شاعىناۋدانىندا, دامبى اۋىلى مەن كوكارنا ساياجايى ماڭىندا تەكسەرۋلەر جۇرگىزىپ, 60-تان استام شەتەلدىكتى انىقتادى. تاياۋ شەتەلدەردەن كەلگەندەردىڭ قازاقستاندا بولۋ مەرزىمى ءوتىپ كەتكەن. الايدا, ەلىمىزدە 16 ناۋرىزدا توتەنشە جاعداي ەنگىزىلگەندىكتەن, ولار جاۋاپكەرشىلىكتەن بوساتىلادى. پوليتسيا قىزمەتكەرلەرى شەتەلدىكتەرگە ءتۇسىندىرۋ جۇمىسىن جۇرگىزدى. ەندى شەتەلدىكتەر 18 مامىردان باستاپ حالىققا قىزمەت كورسەتۋ ورتالىعىنا بارىپ, ەلىمىزدە بولۋ مەرزىمىن ۇزارتا الادى, -دەپ حابارلادى دەپارتامەنتتىڭ ءباسپاسوز قىزمەتى.
ءىس-شارا كەزىندە وزبەكستاندىق 2 ازاماتتا جەكە باسىن كۋالاندىراتىن تولقۇجاتى بولماعانى انىقتالدى. ەندى ولار جەكە باسى انىقتالعانشا, اتىراۋ قالالىق پوليتسيا باسقارماسىنىڭ قابىلداپ-تاراتۋ ورنىنا ورنالاستىرىلدى.
«قاۋىپسىز قالا» ءىس-شاراسى 21 مامىرعا دەيىن جالعاسادى.