بۇگىن اقپاراتتىق-كوممۋنيكاتسيالىق ورتالىعىندا قازاقستان مۇسىلماندارى ءدىني باسقارماسىنىڭ شىمكەنت قالاسى بويىنشا باس يمامى باقداۋلەت ابدراحمانوۆ جانە باس يمامنىڭ ورىنباسارى مۇحامەدجان ەستەمىروۆتىڭ قاتىسۋىمەن ونلاين-بريفينگ ءوتتى.
بريفينگ بارىسىندا توتەنشە جاعداي مەرزىمى اياقتالعاننان كەيىن قالا مەشىتتەرىندە اتقارىلاتىن شارالار مەن قاسيەتتى قادىر كەشى مەن ايت مەرەكەسىن وتكىزۋ تۋرالى, سونداي-اق قۇلشىلىق ۇيىنە كەلۋشى ازاماتتارعا قويىلاتىن تالاپتار جايىندا جان-جاقتى اقپارات بەرىلدى.
- ەلىمىزدە توتەنشە جاعداي مەرزىمى اياقتالىپ, حالقىمىز قالىپتى ءومىر تىرشىلىگىنە اۋىسا باستادى. وسى ورايدا, قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلىنىڭ ۇندەۋىنە سايكەس, ەلىمىزدە 18 مامىردان باستاپ بارلىق مەشىتتەر ارنايى سانيتارلىق تالاپتاردى ساقتاي وتىرىپ اشىلادى. وسى ۋاقىتتان باستاپ مۇسىلمان قاۋىمىنىڭ جەكە قۇلشىلىق جاساۋىنا, قۇران وقىتىپ, نەكە قيدىرۋىنا بولادى. كارانتين تالاپتارىن ساقتاۋ ءۇشىن جاماعاتپەن وقىلاتىن بەس ۋاقىت, جۇما, تاراۋىق نامازدارىنا قاتىستى قويعان ۋاقىتشا شەكتەۋدى ءوز كۇشىندە قالدىرىپ وتىرمىز. بۇل – ءسىز بەن ءبىزدىڭ, ءوز وتباسىمىز بەن ەڭ جاقىن تۋىستارىمىزدىڭ دەنساۋلىعى مەن ءومىرىنىڭ يگىلىگى ءۇشىن قابىلدانعان شارا. تەك جەكەلەگەن تۇردە ناماز وقۋعا رۇقسات ەتىلەدى. مەشىتتە بولۋ ۋاقىت ۇزاقتىعى 15 مينۋت جانە ناماز وقۋشىلاردىڭ اراقاشىقتىعى 1,5 مەتر بولۋى كەرەك, - دەدى شىمكەنت قالاسىنىڭ باس يمامى باقداۋلەت ابدراحمانوۆ.
سونداي-اق باس يمام قاسيەتتى قادىر كەشىن ۇيدە وتكىزۋگە شاقىردى.
- بيىلعى رامازاننىڭ قاسيەتتى قادىر كەشى مامىر ايىنىڭ 19-ىنان 20-سىنا قاراعان تۇنگە سايكەس كەلىپ وتىر. 19 مامىردا مەشىت تاڭعى ساعات 7:00 مەن كەشكى 20:00 ارالىعىندا جۇمىس ىستەيدى. وسى رەتتە بارشاڭىزدى قادىر كەشىن ءوز ۇيلەرىڭىزدە وتكىزۋگە شاقىرامىن. تارتىپكە باعىنۋدى سۇرايمىز, - دەپ اتاپ ءوتتى باقداۋلەت ابدراحمانوۆ. ايتا كەتسەك, بۇگىنگى تاڭدا شىمكەنت قالاسىندا 106 مەشىت بار.
شىمكەنت