ورال قالاسىندا ۇلى وتان سوعىسىنىڭ ارداگەرى, باتىس قازاقستان وبلىسى ازاماتتىق قورعانىس شتابىنىڭ ءبىرىنشى باسشىسى شۇكىر ومار ۇلى مۇحتاروۆقا ارنالعان ەسكەرتكىش تاقتا اشىلدى.
باتىس قازاقستان وبلىسىندا ازاماتتىق قورعانىس شتابى تۇڭعىش رەت 1962 جىلى قۇرىلعان. ونىڭ ءبىرىنشى باسشىسى بولىپ ۇلى وتان سوعىسىنا قاتىسۋشى پولكوۆنيك شۇكىر مۇحتاروۆ تاعايىندالعان ەكەن. ءىى دۇنيەجۇزىلىك سوعىستىڭ قاندى قىرعىنىن كوزىمەن كورگەن مايدانگەر حالىق قاۋىپسىزدىگى جولىنداعى جۇمىستاردى وڭىردە ۇيىمداستىرىپ, ازاماتتىق قورعانىس جۇيەسىنىڭ نەگىزىن قالادى.
شۇكىر مۇحتاروۆ 1922 جىلى باتىس قازاقستان وبلىسىنىڭ تايپاق اۋدانى بازارتوبە اۋىلىندا دۇنيەگە كەلگەن ەكەن. الماتى قالاسىنداعى №12 ورتا مەكتەپتى ءبىتىرىپ, 1941 جىلدىڭ جەلتوقسان ايىندا كەڭەس اسكەر قاتارىنا شاقىرىلدى. سوعىستا «مارس» وپەراتسياسىنا, ۆەليكولۋك جانە نەۆەل وپەراتسيالارىنا قاتىسقان ش.مۇحتاروۆ كۆ تانكىنىڭ مەحانيك-جۇرگىزۋشىسى بولعان. جاۋىنگەرلىك ەرلىگى ءۇشىن «قىزىل جۇلدىز», ءىى دارەجەلى وتان سوعىسى وردەنىمەن, «كەنيگسبەرگتى العانى ءۇشىن», «گەرمانيانى جەڭگەنى ءۇشىن» مەدالىمەن جانە باسقا دا ناگرادالارمەن ماراپاتتالعان.
- ۇلى جەڭىستىڭ 75 جىلدىعى تويلانىپ وتىرعان بيىلعى جىلى وڭىردە سوعىس ارداگەرلەرىنە كورسەتىلەتىن قۇرمەت پەن تاعزىم شارالارى جۇيەلى ۇيىمداستىرىلىپ جاتىر. راس, كارانتين شارتتارىنا بايلانىستى مۇنداي شارالاردىڭ وتكىزىلۋ فورماسى وزگەردى. بىراق وڭىردەگى ءبىر دە ءبىر ارداگەر ءبىزدىڭ نازارىمىزدان تىس قالعان جوق. بۇگىنگى شارا دا اعا ۇرپاقتىڭ ەرلىگى مەن ەڭبەگىنە كورسەتىلگەن لايىقتى باعا دەپ ويلايمىن, - دەدى ەسكەرتكىشتىڭ اشىلۋ سالتاناتىنا قاتىسقان باتىس قازاقستان وبلىسى اكىمىنىڭ ءبىرىنشى ورىنباسارى مۇحتار مانكەەۆ.
جيىنعا باتىس قازاقستان وبلىسى توتەنشە جاعدايلار دەپارتامەنتىنىڭ باستىعى گەنەرال-مايور جاسۇلان جۇماشەۆ, شۇكىر ومار ۇلىنىڭ ۇلى مەن تۋىستارى قاتىستى. جيىلعان حالىق ەسكەرتكىش تاقتاعا گۇل شوقتارىن قويدى.
باتىس قازاقستان