بۇگىن اتىراۋدا پرەمەر-ءمينيستردىڭ ورىنباسارى ەرالى توعجانوۆ باستاعان ۇكىمەتتىك كوميسسيانىڭ جيىنى ءوتتى. وندا ايماقتاعى ەپيدەميولوگيالىق احۋال, «تەڭىز» كەنىشىندەگى جۇمىسشىلاردى شىعارۋ مەن جۇمىسپەن قامتاماسىز ەتۋ جول كارتاسىن جۇزەگە اسىرۋ ماسەلەلەرىنە تالقىعا ءتۇستى.
ەرالى توعجانوۆتىڭ ءمالىم ەتۋىنشە, قازىر ەلىمىزدەگى كوروناۆيرۋس ينفەكتسياسىنىڭ تىركەلۋ دەڭگەيى 2-3 پايىزدى قۇراپ وتىر. بۇل كورسەتكىش مەملەكەت باسشىسى قاسىم-جومارت توقاەۆتىڭ تاپسىرماسىمەن قابىلدانعان ناقتى شارالاردان كەيىن تومەندەپ كەلەدى.
الايدا, اتىراۋ وبلىسىنىڭ اكىمى ماحامبەت دوسمۇحامبەتوۆتىڭ ايتۋىنشا, ايماقتاعى ەپيدەميولوگيالىق جاعداي ءالى دە تۇراقتالا قويعان جوق. قازىرگى كەزدە وڭىردە COVID-19 ينفەكتسياسىن جۇقتىرعان 458 جاعداي تىركەلدى. ناۋقاستاردىڭ 127-ءسى ەمدەلىپ شىقتى. ال, «تەڭىز» كەنىشىنىڭ 384 جۇمىسشىسىنان اتالعان ۆيرۋس انىقتالدى. بۇل ازاماتتار –20 جاتاقحانادا تۇراتىن 33 مەكەمەنىڭ قىزمەتكەرلەرى. «تەڭىز» كەنىشىنەن 17 مىڭ ادام تۇرعىلىقتى مەكەنجايلارىنا جەتكىزىلدى.
دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنا قاراعاندا, «تەڭىز» كەنىشىندە كارانتيندىك تالاپتار جەتكىلىكتى دەڭگەيدە ساقتالماي وتىر. وسىعان وراي مينيستر «تەڭىزشەۆرويل» جشس-ءنىڭ مەردىگەر جانە سۋبمەردىگەر كومپانيالارى باسشىلارىنىڭ جاۋاپكەرشىلىگىن ارتتىرۋعا شاقىردى.
جيىن بارىسىندا «جۇمىسپەن قامتۋ جول كارتاسى – 2020» باعدارلاماسىن وڭىردە جۇزەگە اسىرۋ بارىسى دا قارالدى. ۇكىمەت بيىل 1 ميلليون 220 مىڭ ادامدى جۇمىسپەن قامتۋدى جوسپارلاپ وتىر. اتىراۋ وبلىسىندا بۇل باعدارلاما شەڭبەرىندە 63 جوبا جۇزەگە اسىرىلىپ, 7 مىڭنان استام جۇمىس ورنى اشىلادى. وعان رەسپۋبليكالىق بيۋدجەتتەن 35 ملرد. 308 ملن. تەڭگە ءبولىنىپ وتىر.
جيىندى قورىتىندىلاعان پرەمەر-ءمينيستردىڭ ورىنباسارى ەرالى توعجانوۆ ەپيدەميولوگيالىق احۋالدى باقىلاۋدا ۇستاۋ, «جۇمىسپەن قامتۋ جول كارتاسى – 2020» باعدارلاماسىن ءتيىمدى جۇزەگە اسىرۋ مەن جۇمىسپەن قامتاماسىز ەتۋگە قاتىستى بىرقاتار تاپسىرمالار بەردى.