بيىل مۇنايلى وڭىردە «جۇمىسپەن قامتۋدىڭ 2020-2021 جىلدارعا ارنالعان جول كارتاسى» مەملەكەتتىك باعدارلاماسى اياسىندا 63 جوبا ىسكە اسىرىلىپ, 7 113 ادامدى جۇمىسپەن قامتۋ جوسپارلانىپ وتىر.
–جۇمىس ورىندارىنىڭ كەمىندە 50 پايىزى جۇمىسپەن قامتۋ ورتالىقتارىنىڭ جولدامالارى ارقىلى جۇمىسسىزدارعا ۇسىنىلۋى ءتيىس. وسى ماقساتتا بيىل «جۇمىسپەن قامتۋدىڭ 2020-2021 جىلدارعا ارنالعان جول كارتاسى» مەملەكەتتىك باعدارلاماسىنىڭ اياسىندا 35 ملرد 308 ملن تەڭگە ءبولىندى, دەدى وسىعان وراي ارنايى كەڭەس وتكىزگەن وبلىس اكىمى ماحامبەت دوسمۇحامبەتوۆ.
ماسەلەن, اتالعان باعدارلامانى ىسكە اسىرۋ بارىسىندا تەك اتىراۋ قالاسىندا 17 ينفراقۇرىلىمدىق جوبا ىسكە قوسىلادى. ناتيجەسىندە 2028 جۇمىس ورنى اشىلادى. ونىڭ 1043-ءىن جۇمىسپەن قامتۋ ورتالىعى ارقىلى جۇمىسسىزدارعا ۇسىنۋ كوزدەلىپتى.
–توتەنشە جاعداي كەزىندەگى كارانتين رەجيمىنە بايلانىستى مەردىگەر مەكەمەلەر ءوز جۇمىستارىنا ەندى كىرىسەدى. كوزدەلگەن قاراجاتتىڭ جالپى كولەمىنىڭ كەمىندە 90 پايىزىن وتاندىق وندىرۋشىلەردەن تاۋار ساتىپ الۋعا جۇمساۋدى جوسپارلاپ وتىرمىز, - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى سەرىك قاميدوللا.
وبلىس اكىمى ماحامبەت دوسمۇحامبەتوۆتىڭ پىكىرىنشە, «جۇمىسپەن قامتۋدىڭ 2020-2021 جىلدارعا ارنالعان جول كارتاسى» مەملەكەتتىك باعدارلاماسى اياسىندا جۇزەگە اسۋى ءتيىس جۇمىستاردى ءوز دەڭگەيىندە ۇيىمداستىرا الماي وتىرعاندار بار. ەندى تۇراقتى جۇمىس ورنىن اشىپ, بولىنگەن قاراجاتتى ماقساتتى جانە ۋاقىتىلى يگەرۋ قاجەت.
–باستى ماقسات – ايماقتاعى جۇمىسسىزدىق دەڭگەيىنىڭ وسۋىنە جول بەرمەۋ. قوسىمشا جۇمىس ورىندارىن اشىپ, ولاردى بارىنشا تۇراقتى جۇمىس ورىندارىنا اينالدىرۋ ارقىلى ءار وتباسىنىڭ تابىس كوزىن قامتاماسىز ەتۋ كەرەك, - دەدى وبلىس اكىمى ماحامبەت دوسمۇحامبەتوۆ.