بيىل جازدا ب. مومىش ۇلى داڭعىلىندا سۋ باسۋ ماسەلەسى شەشىلەدى. داڭعىلدا نوسەر كاناليزاتسياسىنىڭ ماگيسترالدى كوللەكتورىنىڭ قۇرىلىسى باستالدى. ەلوردا اكىمى قالانى كەشكىلىك ارالاۋ بارىسىندا جۇرگىزىلىپ جاتقان جوندەۋ جۇمىستارىمەن تانىستى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
«كولىك جۇرگىزۋشىلەرىنە قوزعالىس ءىشىنارا شەكتەلدى. 15 مامىردا جوندەۋ جۇمىستارىنا بايلانىستى قوزعالىس تولىعىمەن جابىلادى (10 كۇنگە). قۇرىلىس جۇمىستارى بيىل جازدا اياقتالادى. ۋچاسكەنى سۋ باسۋ ماسەلەسى تولىق شەشىلەدى - «قايىقپەن جۇرەتىندەي سۋ تاسقىنى بولمايدى».
مەملەكەت باسشىسى نوسەرلى جاڭبىر سۋ جينالۋىنىڭ الدىن الۋ ءۇشىن كارىزدەردى سالۋ جۇمىستارىنىڭ قارقىنىن ارتتىرۋدى تاپسىردى.
«جاستار» شاعىن اۋدانىنداعى جاڭا قۇرىلىستاردىڭ قۋاتى تاۋلىگىنە 42 مىڭ تەكشە مەتردەن اسادى. بۇل نوسەرلىك سۋ كاناليزاتسياسىنىڭ وتكىزۋ قابىلەتىن ايتارلىقتاي جاقسارتۋعا مۇمكىندىك بەرەدى: بوگەتسىز جيناۋدى, جەر ءۇستى اعىندارىن بۇرۋدى جانە تازارتۋدى قامتاماسىز ەتەدى. تازارتۋ قۇرىلعىلارى تاشەنوۆ, باراەۆ, ءۋاليحانوۆ, يمانباەۆ جانە رەسپۋبليكا داڭعىلدارىنىڭ جاڭبىرلى سۋ باسۋىن بولدىرماۋعا مۇمكىندىك بەرەدى. تازارتۋ قۇرىلعىلارى جەر استىندا ورنالاسقاندىقتان, قۇرىلعى ۇستىندەگى اۋماقتا اباتتاندىرۋ جۇمىستارىن جۇرگىزۋ, شاعىن ساۋلەت نىساندارىن ورناتۋ قاراستىرىلعان.
قۇرىلىس جۇمىستارىن 2021 جىلى اياقتاۋ جوسپارلانىپ وتىر. 2019 جىلى مىڭجىلدىق اللەياسى اۋماعىندا ەكى ۋچاسكەدەگى نوسەرلىك سۋ كارىزىنىڭ ماسەلەسى شەشىلدى» دەلىنگەن حابارلامادا.