بۇرىنعىلاردان قالعان مىناداي ءبىر ءتامسىل بار: ەرتەدە ء بىر مەملەكەتتە پاتشاسى ءدال ون جىل بيلىك قۇرعاننان كەيىن ونى تاقتان الىپ, ارنايى كەمەگە وتىرعىزىپ, ەلسىز ءبىر ارالعا تاستاپ قويادى ەكەن.
وسىلاي پاتشالىقتىڭ تىزگىنىن جاڭادان قولىنا العان كەلەسى ءبىر جاڭا پاتشا ىزاعا بۋلىعىپ, ءوزىنىڭ ۋازىرىنە بىلاي دەپتى:
-مەن دە كۇندەردىڭ كۇنىندە الدىڭعى پاتشالار سەكىلدى قيىن تاعدىردى باستان كەشپەكپىن بە؟! مەن دە الدىڭعىلار سەكىلدى ەلسىز ارالدىڭ ءشول-دالاسىندا اپتاپ-ىستىققا زارىعىپ, قينالىپ ءومىر سۇرۋگە ۇكىم ەتىلمەكپىن بە؟!..
سوندا ءۋازىرى بىلاي دەپ كەڭەس بەرىپتى:
-قۇرمەتتى پاتشام, ءسىز ەلسىز ارالدا ءومىر ءسۇرۋدى قالاماساڭىز, پاتشالىق كەزەڭىڭىزدى تەك راحاتتا وتكىزبەي, ءومىرىڭىز بەن مال-دۇنيەڭىزدى اقىرى ءوزىڭىز باراتىن ەلسىز ارالدى گۇلدەندىرۋگە سارپ ەتپەيسىز بە؟!
بۇل ءسوزدى ەستىگەن پاتشا تەرەڭ ويلانىپ كورسە… ءۋازىردىڭ ايتقانى حاق ەكەن.
جوعارداعى ءتامسىلدى تاپسىرلەپ كورەلىك:
پاتشا – ءتامسىلدىڭ باس كەيىپكەرى. ياعني, ءاربىر ادام ءوزى ءۇشىن ءوزى پاتشا. ال, يمانى مەن اقىلى – ونىڭ ءۋازىرى. بۇل ەكەۋى ەگىزدەر سەكىلدى بولە-جارۋعا كەلمەيتىن ءبىرتۇتاس ۇعىم. اقىل جوق جەردە يماندى ىزدەۋدىڭ ءجونى جوق, يمان جوق جەردە اقىلدى دا ىزدەۋدىڭ قاجەتى شامالى. دەمەك, يمان مەن اقىلىمىز ءبىز ءۇشىن – دانا كەڭەسشىمىز.
ال, كەمە – تابىت. ادامداردىڭ كورەر كۇنى, تاعدىرى سول – ءبىر كۇن بولماسا ءبىر كۇن ءوزىنىڭ تاعىنان تۇسەدى, ياعني عۇمىرى بىتەدى. سول ءبىر كەمەگە, ياعني, تابىتقا سالىنادى. ەلسىز ارال – ءبىزدىڭ باراتىن ورنىمىز (كورىمىز). قىسقاشا ايتقاندا, اقيرەت ارالى. ەگەر ءبىز بۇل ومىردە دۇنيەلىك ىستەرمەن عانا شەكتەلسەك, الگى باراتىن ارالىمىز راسىندا ەلسىز-سۋسىز قالىپ, قۇم-دالادان عانا تۇزىلگەن بولادى. ەگەر, حاق جولىمەن ءجۇرىپ, جاقسى امالداردى كوپ ىستەسەك, الگى ەلسىز ارالدى كوركەيتكەن بولامىز. بارار ورنىمىز ءشول-دالا, توزاق ازاپتارى ەمەس, ءجاننات باقتارى بولادى. «اقيرەتىڭ قايىرلى بولسىن!» دەپ دۇعا ەتكەندە ءاسىلى وسى نارسە نازاردا تۇرسا كەرەك. بارشامىزدىڭ اقيرەتىمىز قايىرلى بولسىن! دەمەك, اقيرەت ارالىن فيردوۋس باقتارىمەن قايىرلى قىلۋىمىز - ءوزىمىزدىڭ تىرىدەگى امالدارىمىزگا بايلانىستى ەكەن. حازىرەتى ءالي (ر.ا) ايتقانىنداي: «جانناتقا ىنتىققان ادام – جاقسىلىق ەتۋگە اسىعادى, ءجاھاننامنان قورىققان ادام – ءناپسىسىن جامان ءىس-ارەكەتتەن قايتارادى. ءولىمدى حاق دەگەن ادام – دۇنيەنىڭ قىزىقتارىنا بوي الدىرمايدى».