قىسقا مەرزىمدە سالىنعان قالالىق جۇقپالى اۋرۋلار ورتالىعى 3 مامىردا جۇمىسىن باستادى. ورتالىقتىڭ ديرەكتورى اننا تسەپكەنىڭ ايتۋىنشا, ورتالىق تولىعىمەن جۇمىس ىستەپ تۇر. بۇل تۋرالى قالا اكىمدىگىنىڭ رەسمي سايتى حابارلادى.
نىسان 200 ناۋقاسقا ەسەپتەلگەن, ونىڭ 20-ى رەانيماتسيالىق جانە 180 پالاتالىق ورىن. بۇگىندە مۇندا 178 ناۋقاس بار.
«ورتالىقتىڭ باستى ەرەكشەلىگى - لاس اۋانى پاتسيەنتتەر ورنالاسقان پالاتاعا كىرگىزبەي, دالىزگە جىبەرەتىن اعىندى-سورعىلى جەلدەتۋىنىڭ بولۋى. بۇل پەرسونال مەن اۋرۋحانا ىشىندە ىندەت جۇقتىرۋدىڭ الدىن الادى. نىساننىڭ ەكىنشى ارتىقشىلىعى – مۇنداعى «لاس» جانە «تازا» ايماقتاردىڭ اراسى دۇرىس بولىنگەن, ياعني ناۋقاس پەن مەديتسينالىق پەرسونالدىڭ ورنالاسۋى. وسىلايشا, نۇر-سۇلتاننىڭ جاڭا ينفەكتسيالىق ورتالىعى بارلىق زاماناۋي تالاپتارعا ساي», - دەدى ا.تسەپكە.
ونىڭ ايتۋىنشا, ورتالىقتا دياگنوستيكا جاساۋعا قاجەتتى جاعداي بار. بارلىق ناۋقاسقا كومپيۋتەرلىك توموگرافيا جاسالىپ, كەشەندى زەرتتەۋلەر جۇرگىزىلىپ, وكپەدەگى وزگەرىستەر انىقتالادى. وكىپەنى جاساندى جەلدەتۋ اپپاراتى مەن وتتەگى قولجەتىمدى.
رەانيماتسيالىق بولىمنەن بولەك ناۋقاستار وتتەگى تەراپياسىن الاتىن ارنايى پالاتالار بار. وسى كۇنى ورتالىقتا 300-گە جۋىق مامان جۇمىس ىستەيدى, ولار دارىگەرلەر مەن مەديتسينا قىزمەتكەرلەرى.