اۆتوبۋستار ساعات 07:00-دەن 21:00-گە دەيىن جۇرەدى. ءبىرىنشى كەزەڭدە لينياعا قالالىق باعدارلار شىقسا, ەكىنىشى كەزەڭدە قالا ماڭىنا قاتىنايتىن باعدارلار شىعادى, دەپ حابارلادى قالا اكىمدىگىنىڭ ءباسپاسوز قىزمەتى.
«دەزينفەكتسيالىق جۇمىستار بۇرىنعىداي جۇرگىزىلەدى. اۆتوبۋس جۇرگىزۋشىلەرى بارلىق قاۋىپسىزدىك شاراcىن ساقتايدى: بەتپەردە, قولعاپ كيىپ, انتيسەپتيك قولدانادى. سول شارالاردى جولاۋشىلار دا ساقتاۋ قاجەت.
ەلوردادا جولاۋشىلاردى جانە جۇكتى اۆتوموبيل كولىگىمەن تاسىمالداۋ ەرەجەسىنە سايكەس, اۆتوبۋستاردا جولاۋشىلاردى وتىرعىزۋ الدىڭعى ەسىك ارقىلى, ال ءتۇسىرۋ قالعان ەكى ەسىك ارقىلى جۇرگىزىلەدى.
سونداي-اق جۇرگىزۋشىلەر بيلەت ساتۋدى ۋاقىتشا توقتاتادى. جول ءجۇرۋ ءۇشىن كولىك كارتالارى مەن جولاقى تولەۋدىڭ بالاما تاسىلدەرىن قولدانۋعا بولادى. ولار SMS, QR-كود جانە ءموبيلدى قوسىمشالار. كارانتين ەنگىزىلگەنگە دەيىن قولما-قول اقشاسىز تولەم ۇلەسى 98%-دى قۇرادى.
بۇگىنگى كۇنى ەلوردا قوعامدىق كولىگىندە SMS پەن QR ارقىلى تولەم جاساۋدىڭ كەلەسى مۇمكىندىكتەرى بار: QR-كود نەمەسە كودتى تەرۋ ارقىلى تولەۋ: kaspi.kz, Homebank, SMSBUS, راحمەت, AstraBus, My Beeline, SENIM, Plus24, My Activ, OYBY. تەلەفون تەڭگەرىمى ارقىلى SMS-پەن تولەم جاساۋ (2505 نومىرىنە حابارلاما جىبەرۋ): Activ/Kcell, Beeline, Tele2, Altel ابونەنتتەرى ءۇشىن قولجەتىمدى.
كارانتين كەزىندە ساتىپ الىنعان ايلىق جول ءجۇرۋ تاريفتەرى پايدالانۋشىلاردىڭ كولىك كارتالارىنا قايتا جۇكتەلەدى. وسىلايشا, ءساۋىر ايىنداعى جول ءجۇرۋ مامىر ايىنا اۋىستىرىلادى. ايلىق جول ءجۇرۋ 12 مامىردان 11 ماۋسىمعا دەيىن جارامدى بولادى.
اتاپ وتسەك, 28 ناۋرىزدان باستاپ قوسىمشا تاريفتەر ىسكە قوسىلدى. ەلوردا قوعامدىق كولىگىندە 18 جاسقا دەيىنگى بالالار كولىك كارتاسى بار بولعان جاعدايدا تەگىن جۇرە الادى» دەلىنگەن حابارلامادا.