بۇل توپتامادا ءبىر كۇندە دۇنيەجۇزىندە بولعان تابيعي اپاتتى جاعدايلاردى جاريالاپ وتىرامىز. 11 مامىردا بولعان ءىرى وقيعالار:
ساۋد ارابياسىنىڭ باتىسىنداعى تايف قالاسىندا قاتتى جاۋعان جاۋىن سالدارىنان سۋ تاسقىنى بولدى. قالاداعى بىرنەشە اۋداندى سۋ باسقان. ورتالىقتاعى سۋ دەڭگەيى 50 سم-گە دەيىن كوتەرىلگەن. زارداپ شەككەندەر جوق.
شىعىس افريكا ايماعىنداعى ۋگاندانىڭ باتىس ايماقتارىنداعى جويقىن سۋ تاسقىنىنىڭ سالدارىنان 100 مىڭعا جۋىق ادام جەرگىلىكتى مەكتەپتەردە, شىركەۋلەردە جانە قوعامدىق عيماراتتاردا قۇرىلعان ۋاقىتشا باسپانالارعا ەۆاكۋاتسيالاندى. ۋگاندا ۇكىمەتىنىڭ مالىمەتىنشە, 5 مامىردان باستاپ قاتتى جاۋعان نوسەردىڭ سالدارىنان كاسەكە جانە بۋنديبۋگيو ايماقتارىنداعى بارلىق وزەندەردىڭ ارناسى تولىپ كەتتى. اۋىل شارۋاشىلىعىنىڭ جەرلەرىنە زيان كەلىپ, مال قىرىلعان.
مەكسيكانىڭ چيۋاۋا شتاتى مەن سولتۇستىگىندە ورنالاسقان سيۋداد-حۋارەس قالاسىن جالعايتىن جولدا تورنودا بولدى. دەرەكتەر بويىنشا, مەتەورولوگيالىق قۇبىلىس 135 شاقىرىم جەردە بولعان. زارداپ شەككەندەر تۋرالى اقپارات جوق.
پولشانىڭ ۆارميا جانە ماسۋريا ايماقتارىندا قار جاۋدى. قاردىڭ قالىڭدىعى – 5 سم-گە دەيىن. ەرىپ جاتقانىنا قاراماستان جول قوزعالىسىندا قيىندىقتار تۋىنداۋدا.
يتاليانىڭ ريم قالاسىندا جەر سىلكىندى. ماگنيتۋداسى 3.3. جەر سىلكىنىسىنىڭ ەپيتسەنترى ەل استاناسىنان 10 شاقىرىم جەردە ورنالاسقان شاعىن قالا فونتە-نۋادا بولدى. زارداپ شەككەندەر تۋرالى اقپارات جوق.
يندونەزيادا Jag Leela ماي قۇيۋ تانكى ورتەندى. الدىمەن ەكى رەت جارىلىس داۋىسى ەستىلدى, سودان كەيىن جالىن پايدا بولىپ, ۇزىندىعى 250 مەترلىك كەمەدە ۇلكەن قارا ءتۇتىن پايدا بولدى. ناتيجەسىندە 22 ادام جاراقات الدى.
كانادانىڭ نيۋ-برانسۋيك پروۆينتسياسىنا قالىڭ قار جاۋدى. كەيبىر اۋدانداردا 30 سم-گە دەيىن قار ءتۇستى. اۋا-رايىنىڭ قولايسىزدىعى ايماقتىڭ جولدارىنداعى جاعدايدى ناشارلاتىپ, ەلەكتر ەنەرگەتيكاسىن سوندىرۋگە تۋرا كەلدى. وسىلايشا 2 مىڭ ءۇي جارىقسىز قالدى.
تۇركيانىڭ ارداحان قالاسىندا قار جاۋدى. مامىر ايىندا گۇلدەۋگە دايىن تۇرعان اعاشتار قار جامىلىپ, كەيبىر اعاشتاردىڭ بۇتاقتارى سىندى.قالانىڭ كەيبىر جەرلەرىندە قار جامىلعىسىنىڭ بيىكتىگى 10-15 سم-دەن اسادى.