وبلىستىق توتەنشە جاعدايلار دەپارتامەنتىنىڭ مالىمەتىنشە, شىعىستاعى ءشۇلبى سۋ قويماسىنان جىبەرىلگەن سۋ ەرتىس وزەنىنىڭ ارناسىنان اسىپ كەتكەن.
سوندىقتان اقسۋ قالاسىنىڭ شەتىندەگى ۇيلەردىڭ باقشالارى, شارۋاشىلىق جايلارى سۋ ىشىندە قالدى.
سونداي-اق بۇل ۇيلەردىڭ تومەن دەڭگەيلى اۋماقتا سالىنۋى دا سۋدىڭ كەلۋىنە ءبىر سەبەپ.
اعىن سۋ وسى اۋماقتاعى ەرىگەن قار سۋىنان قورعاپ تۇرعان بوگەت-دامبانىڭ استىنان وتكەن. سۋدىڭ دەڭگەيى 5-10 سانتيمەتر.
قازىر قالالىق توتەنشە جاعدايلار ءبولىمىنىڭ جانە جەرگىلىكتى اكىمدىك جەدەل ارەكەتتەر جۇرگىزۋدە.
بۇعان دەيىن الدىن-الا سۋ باسۋ قاۋپى بار ۇيلەردى ينەرتتى ماتەريالدار تولتىرىلعان قاپشىقتارمەن قورشاپ, سۋ دەڭگەيىن باقىلايتىن ارنايى ولشەۋ سىزىقتارىن ورناتىلعان.
سونىمەن بىرگە «دوسۋگسەرۆيس» كوممۋنالدىق كاسىپورنىنىڭ ەكى موتوپومپاسى, ەكى تراكتور جانە التى قىزمەتكەرى سۋ سورۋ جۇمىستارىنا كىرىستى. مالىمەت بويىنشا, باقشا اۋماقتارىنان 3500 شارشى مەتر سۋ تارتىلعان.
ال, قازىر ءشۇلبى سۋقويماسىنان جوسپارلى سۋ جىبەرۋ كەزەڭى اياقتالىپ كەلەدى. ياعني, ەرتىس وزەنىنىڭ ارناسىنداعى سۋ دەڭگەيى دە تومەندەي باستايدى دەگەن ءسوز.
پاۆلودار وبلىسى