ەلىمىزدە بيىلعى العاشقى ءتورت ايدىڭ قورىتىندىسىندا جەڭىل ونەركاسىپتە جالپى ءوندىرىس كولەمى 13,9% ءوستى. ونىڭ ىشىندە توقىما بۇيىمدارى ءوندىرىسى 13,4%, بىلعارى جانە وعان جاتاتىن ونىمدەردىڭ 12,4%, كيىم ءوندىرىسى 11,3% ۇلعايعان. بۇل تۋرالى يدم ءباسپاسوز قىزمەتى حابارلادى.
بۇل ءوسىم سالانىڭ ءىرى كاسىپورىندارىنىڭ وندىرىستىك قۋاتىن ارتتىرۋمەن بايلانىستى بولدى. اتاپ ايتساق, «بال تەكستيل» جشس بىلتىر كىلەم جانە كىلەم بۇيىمدارىن شىعاراتىن ءۇشىنشى تسەحتى ىسكە قوستى. «Qazaprodgroup» جشس اياق كيىم شىعاراتىن, «ەكونىم» جشس ءجىپ, سينتەتيكالىق ءجىپ, باۋ, باۋلار, جەلى ءورۋ, ارقان-ءجىپ بۇيىمدارىن ءوندىرۋ جوبالارىن ىسكە قوسىپ, بارلىق كىشى سالالاردا ءوسىم بايقالدى. «Alliance» ساۋدا-ونەركاسىپ كومپانياسى» جشس-دە (بۇرىنعى «يۋتەكس» اكتسيونەرلىك قوعامى) ماقتا-ماتا ءيىرىمجىپ شىعارۋ بويىنشا توقتاپ تۇرعان ءوندىرىس ىسكە قوسىپ, بيىلعى ءى توقساندا 150 توننا ءيىرىمجىپ وندىرىلگەن.
سونىمەن قاتار حالىقتى ينفەكتسيالاردان قورعاۋ قۇرالدارىمەن قامتاماسىز ەتۋ ماقساتىندا بەتپەردەلەر وندىرىسىنە 70-تەن استام تىگىن كاسىپورىنى تارتىلدى. بيىلعى 15 ناۋرىزدان باستاپ بەتپەردەلەردىڭ جالپى شىعارىلىمى 40 ملن. دانانى قۇرادى. سونىمەن قاتار, مەديتسينا قىزمەتكەرلەرىنە ارنالعان قورعانىش كوستيۋمدەرىن تىگۋگە تاپسىرىستار دا ارتتى. «Azala Textile» جشس 9 ستانوكتى ىسكە قوسىپ, داكە شىعارۋ كولەمىن تاۋلىگىنە 1,2 مىڭ شارشى مەتردەن 10 مىڭ شارشى مەترگە دەيىن ۇلعايتقان.