حوككايدو ارالىندا قازاقستان استاناسىنىڭ قۇرمەتىنە «نۇر-سۇلتان» دەپ اتالاتىن ساكۋرانىڭ جاڭا سۇرىپى گۇلدەدى. جاڭا سۇرىپتى حوككايدو پرەفەكتۋراسىنىڭ ورمان شارۋاشىلىعى عىلىمي-زەرتتەۋ ينستيتۋتى شىعاردى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
«نۇر-سۇلتان» ساكۋراسىنىڭ ەرەكشەلىگى مينۋس 40 گرادۋسقا دەيىن ايازعا توزىمدىلىك – بۇل استانامىزدىڭ اۋا-رايى جاعدايلارىنا بەيىمدەلۋ ءۇشىن ەڭ قاجەت سيپاتتامالاردىڭ ءبىرى.
قازاقستاننىڭ استاناسىن بەينەلەيتىن ساكۋرا گ ۇلى قوس گۇلدەنۋ اسەرىنە بايلانىستى 10 قارداي اق كۇلتە جاپىراقشالاردان تۇرادى, ال ساكۋرانىڭ باسقا سۇرىپتارىندا ادەتتە 5 جاپىراقشا عانا بار.
ساكۋرانىڭ جاڭا سۇرىپىنىڭ اۆتورى - حوككايدو پرەفەكتۋراسى ورمان شارۋاشىلىعى عىلىمي-زەرتتەۋ ينستيتۋتىنىڭ دوكتورى يويچي ۆاكيتا ايتقانداي: «مەنىڭ الەمدەگى سۋىق ايماقتاردا ساكۋرانى وسىرۋمەن اينالىساتىن مولەكۋليارلىق بيولوگ رەتىندەگى ماقساتىم – ايازعا ءتوزىمدى ساكۋرانىڭ گەنەتيكالىق الەۋەتىن ۇنەمى كەڭەيتۋ. «نۇر-سۇلتان» سۇرىپى عىلىمي ەكسپەريمەنت, سونداي-اق قازاق حالقىنا سىيلىق-تىلەك بولىپ تابىلادى. گۇلدەپ تۇرعان ساكۋرانى تاماشالاۋ جاپون حالقىنىڭ نەگىزگى مادەني كودى جانە بۋدديستىك سەنىمدەردىڭ نەگىزىندە ساكۋرا گۇلدەرى تابيعاتتىڭ شىعارماشىلىق كۇشىن جانە كوكتەمنىڭ كەلۋىن بىلدىرەدى. وسىلايشا, مەن قازاقستانعا كوروناۆيرۋستىق ينفەكتسيانىڭ تارالۋىن توقتاتىپ, داعدارىستان تەز ارادا شىعۋدى تىلەيمىن».
ايازعا ءتوزىمدى «چيشيمازاكۋرا» ساكۋراسىنىڭ ءتۇرى جاپونيانىڭ ەڭ سولتۇستىك ايماعى – حوككايدو پرەفەكتۋراسىندا وسەدى جانە ورمان شارۋاشىلىعى عىلىمي-زەرتتەۋ ينستيتۋتى بيوتەحنولوگيالاردى قولدانۋ ارقىلى ساكۋرانىڭ وسى ءتۇرىن سۇرىپتاۋمەن اينالىسادى.
تانىمال جاپون ساۋلەتشىسى جانە نۇر-سۇلتان قالاسى باس جوسپارىنىڭ ازىرلەۋشىسى كيسيو كۋروكاۆانىڭ ۇلى ميكيو كۋروكاۆانىڭ ايتۋىنشا, ونىڭ اكەسى تۇڭعىش پرەزيدەنت نۇرسۇلتان نازارباەۆتىڭ ەرەكشە سەنىمىنە ارقا سۇيەي وتىرىپ قازاقستان استاناسىنىڭ باس جوسپارىن ازىرلەۋ كەزىندە ءوزىنىڭ مەتابوليزم مەن سيمبيوز ارحيتەكتۋرالىق باعىتىنىڭ تۇجىرىمداماسىن ىسكە اسىردى. ارحيتەكتوردىڭ نەگىزگى يدەياسى «سيمبيوتيكالىق ساۋلەت» ءپرينتسيپى بويىنشا قالالىق جانە تابيعي ورتانى ۇيلەستىرۋ بولدى. «جاپون عالىمدارى ازىرلەگەن نۇر-سۇلتان اتتى ساكۋرانىڭ جاڭا سۇرىپى ءبىزدىڭ ەلدەردى بىرىكتىرەتىن تاعى ءبىر فاكتور بولاتىنىنا سەنىمدىمىن», - دەدى م.كۋروكاۆا.
ساكۋرا اعاشى جاپونيانىڭ ۇلتتىق برەندى بولىپ تابىلادى. حانامي نەمەسە گۇلدەنۋ كەزىندە ساكۋرانى تاماشالاۋ ءداستۇرى جىل سايىن ەلگە ميلليونداعان تۋريستەردى تارتادى. بۇل ارتىقشىلىقتى گەرمانيا, فرانتسيا جانە اقش سياقتى جايلى كليماتى بار وڭىرلەردە ورنالاسقان ەلدەر شەتەلدىك تۋريستەردى تارتۋ ءۇشىن پايدالانۋدا.
جاپونيادا حانامي كەزەڭى ىستىق وكيناۆادا اقپان ايىنان باستالىپ, ايازدى حوككايدودا مامىرعا دەيىن سوزىلادى. ساكۋرا گۇلدەرىنىڭ «تولقىنى» بىرتىندەپ ەلدىڭ وڭتۇستىگىنەن سولتۇستىگىنە تارالادى. جاپون ارالدارىنىڭ پايدا بولۋىنان باستاپ ءوسىپ كەلە جاتقان ەلدە 10-عا جۋىق جابايى ساكۋرانىڭ تۇرلەرى بار. جاپوندىقتار ءۇشىن ساكۋرانى تاماشالايتىن ەڭ ىڭعايلى ورىن – شيندزيۋكۋ ۇلتتىق پاركى, وندا 300-دەن استام ساكۋرانىڭ سۇرىپتارى وتىرعىزىلعان.