پارلامەنت سەناتىنىڭ دەپۋتاتى, ەقىۇ-نىڭ ءىس باسىنداعى ءتوراعاسىنىڭ جەكە وكىلى ءادىل احمەتوۆتىڭ ۇيىمداعى ارنايى دەپارتامەنتتەردىڭ باسشىلىعى جانە وكىلدەرىمەن كەزدەسۋىندە يسلامنان قورقۋشىلىق پەن الەمدەگى مۇسىلمانداردى كەمسىتۋشىلىكتى جويۋ سالاسىنداعى ەقىۇ مەن يكۇ اراسىنداعى ىنتىماقتاستىقتى دامىتۋ ماسەلەلەرى تالقىلاندى, دەپ حابارلادى پارلامەنت سەناتىنىڭ ءباسپاسوز قىزمەتى.
ءا.احمەتوۆ دجيدداداعى (ساۋد اراۆياسى) يكۇ شتاب-پاتەرىنە رەسمي ساپارى اياسىنداعى كەلىسسوزدەرى بارىسىندا يكۇ باس حاتشىلىعىن قازاقستاننىڭ ەقىۇ ءتوراعاسى لاۋازىمىنداعى قىزمەتىمەن تانىستىردى.
ء“وزارا توزىمدىلىك, ءدىني الۋاندىقتى تولەرانتتىلىق تۇرعىدا قابىلداي ءبىلۋ استانانىڭ ەقىۇ-داعى جانە تۇتاس حالىقارالىق ارەناداعى باسىمدىقتارىنىڭ ءبىرى بولىپ تابىلادى”, – دەپ اتاپ ءوتتى جەكە وكىل.
يكۇ باسشىلىعى قازاقستان پرەزيدەنتى ن.نازارباەۆتىڭ باتىس پەن يسلام الەمى, ءتۇرلى دىندەر مەن ءمادەنيەتتەر اراسىنداعى ۇنقاتىسۋلار مەن ءوزارا تۇسىنىستىكتى نىعايتۋ جونىندەگى ساياساتى مەن حالىقارالىق باستامالارىنا جوعارى باعا بەردى.
يسلام كونفەرەنتسياسى ۇيىمىنا مۇشە ەلدەر يسلامعا جانە مۇسىلمان الەمىنە قاتىستى تەرىس كوزقاراستار مەن نانىمداردى ەڭسەرۋ ىسىندە قازاقستاننىڭ ءۇستىمىزدەگى جىلعى ەقىۇ-عا جانە الداعى جىلى يكۇ-عا توراعالىق ەتۋىنە زور ءۇمىت ارتىپ وتىرعانى ايتىلدى.
تاراپتار بايلانىسقا ازىرلىگىن بىلدىرە كەلىپ, ىنتىماقتاستىقتى دامىتۋداعى بىرلەسكەن ناقتى قادامداردى بەلگىلەدى. ولاردىڭ ىشىندە ەقىۇ-نىڭ ۇستىمىزدەگى جىلعى ماۋسىمدا استانادا وتەتىن توزىمدىلىك جانە كەمسىتۋشىلىك ماسەلەلەرى ءجونىندەگى جوعارى دەڭگەيدەگى كونفەرەنتسياسىنا يكۇ دەلەگاتسياسىنىڭ قاتىسۋى جانە وسى شارا اياسىندا كورنەكتى يسلام جانە باتىس عالىمدارىن تارتا وتىرىپ, يسلامنان قورقۋشىلىق ماسەلەلەرى بويىنشا جەكە سەمينار وتكىزۋ ماسەلەلەرى بار.