الماتى وبلىسى, ىلە اۋدانى, اقشي اۋىلىندا دۇنيەگە كەلگەن ەگىز ۇل – قاسىم مەن جومارت ورىنتاي بۇگىندە ورال قالاسىندا وتان الدىنداعى پارىزىن اتقارىپ ءجۇر.
– اعايىندى ساربازدار 5517 اسكەري بولىمدە بايلانىس تورابىنا كەزەكشى راديوتەلەگرافيست مىندەتىن اتقارۋدا. جومارت جاۋىنگەرلىك قىزمەتكە تاڭدا تۇسسە, قاسىم تۇنگى اۋىسىمدى الماستىرادى. جاۋىنگەرلەر لەيتەنانت اباي قوجامۇرات پەن ەفرەيتور ەلدار ساميعوللا ۇيرەتكەن ءاربىر ءتالىمدى جادىندا ساقتاپ, ءىس جۇزىنە قولدانىپ ءجۇر, – دەيدى وسى اسكەري ءبولىمنىڭ قىزمەتكەرى, مايور جامال مۇقىشەۆا. قاسىم مەن جومارت جاۋىنگەرلىك كەزەكشىلىكتە ءاردايىم قىراعىلىق تانىتىپ, اسكەري مىندەتىن جاۋاپكەرشىلىكپەن اتقارعانى ءۇشىن بىرنەشە رەت ماراپاتقا دا يە بولىپتى.
كوپ بالالى وتباسىندا دۇنيەگە كەلگەن قوس سارباز اسكەر قاتارىنا الماتى وبلىسىنان 2019 جىلدىڭ جاز ايىندا شاقىرىلعان. ورىنتاي اۋلەتىنىڭ كەنجەسى جاۋىنگەرلىك دايىندىق نورماتيۆتەرىن ءاردايىم ەڭ ۇزدىك باعاعا ورىندايدى ەكەن.
– اسكەرگە كەلگەنىمە قۋانامىن. بۇل جەردە ۇيدەگىدەي ەركىندىك بولماسا دا, ءاربىر ىسىڭە جاۋاپكەرشىلىكپەن قاراۋدى ۇيرەنەسىڭ. جالپى, اسكەري ءومىردى كورۋ, قاتال ءتارتىپتى باستان وتكەرۋ ءاربىر جاس جىگىتكە شىڭدالۋ ءۇشىن قاجەت. وتان الدىنداعى اسكەري بورىشىمدى امان-ەسەن اتقارىپ, ەلگە ورالعان سوڭ پوليتسيا قاتارىندا قىزمەت ەتكىم كەلەدى, – دەيدى قاسىم.
– جاس كۇنىمنەن سپورتتى سەرىك ەتتىم. سوندىقتان بولار, اسكەر قاتارىنداعى جاتتىعۋلار مەن ءۇشىن اسا قيىندىق تۋعىزعان جوق, – دەيدى جاس كۇنىنەن فۋتبولشى رەتىندە تالاي جارىسقا قاتىسىپ, جۇلدەگەر بولعان جومارت. ول اسكەردەن كەيىن دە سپورتتىق مانسابىن جالعاستىرماق.
ەرەكشە ەسىمدى يەلەنگەن ەگىز سارباز بۇكىل قازاقستان حالقىن وتان قورعاۋشىلار كۇنىمەن قۇتتىقتاپ, اسكەري مىندەتىن ابىرويمەن اتقارۋعا ۋادە بەرىپ وتىر.
باتىس قازاقستان وبلىسى