وڭاشالىق – وي ورمانىن ارالار ءسات. ادامزات بالاسى ءۇشىن سىناق مەرزىمى جۇمىر باستى پەندەنى سان قيالعا جەتەلەيدى. ەلىمىزدىڭ باس باسىلىمىندا قازاقستان پرەزيدەنتى قاسىم-جومارت توقاەۆتىڭ «ەلىمىز بۇل قيىندىقتان شىڭدالىپ شىعادى» اتتى سۇحباتىن وقىپ, كوڭىلگە كوپ وي ءتۇيىپ وتىرمىز.
بۇل جولى دا پرەزيدەنت قارا ورمان حالىقتى تولعاندىرعان كوپ ماسەلەلەردى قاۋزادى. «اباي ءوزىنىڭ «تولىق ادام» تۇجىرىمىن ميراس ەتسە, ءال-فارابي «باقىتقا جەتۋ جولىنداعى قايىرىمدى قوعام» قاعيداسىن وسيەت ەتىپ قالدىردى. ۇلى ويشىلداردىڭ ادىلدىك پەن ىزگىلىك جونىندەگى ۇستانىمى بارشاعا بەلگىلى. مەنىڭ «حالىق ۇنىنە قۇلاق اساتىن مەملەكەت» اتتى تۇجىرىمدامام وسى قاعيدالارمەن ۇندەسەدى», دەيدى مەملەكەت باسشىسى.
مەنىڭ ۇعىمىمدا ۇلىلاردى ۇلىقتاۋ, ولاردىڭ ەڭبەگى مەن ەسىمىن جاڭعىرتۋ ۇرپاق ءۇشىن ونەگەلى ءورىس بولۋعا ءتيىس. ءال-فارابي, اباي تويلارىنىڭ بەرەرى دە, بەدەرى دە سول ۇلىلىققا جاقىنداۋ.
بۇل تويلاردىڭ ابايشا ايتقاندا, «بوسقا مال شاشپاق ەمەس», وركەنيەتتىڭ ورىنە باستار ۇلاعاتىمەن ماڭگى ەستە قالعانى ابزال. سوناۋ ءبىر جىلى ۋكرايننىڭ ۇلى اقىنى تاراس شەۆچەنكونىڭ كۇندەرىنە قاتىسقانىم بار. كانەۆتەگى تاراس جەرلەنگەن بيىكتە مىڭداعان حالىقتى كوردىم. قارا تاستى ايالاپ, ءمىناجات ەتكەن ەلدى كوردىم. جۇرتتىڭ ۇلىلىققا تاعزىم ەتىپ, شىن ماحابباتپەن جارىسا تاراس جىرلارىن وقىعانىنا تەبىرەندىم. سوندا تۇرىپ: «شىركىن, ءبىزدىڭ ابايدىڭ جيدەبايى قازاق بالاسى تابىنىپ بارار, ساعىنىپ بارار ورىنعا اينالسا عوي», دەپ ارمانداعان ءساتىم ەسكە ءتۇسىپ وتىر.
اباي, ءال-فارابي – ماڭگىلىك ونەگە. ادامزات بالاسى اقىل-وي ارمانىنا تۇسكەن مىناۋ الماعايىپ دۇنيەدە بۇل ەسىمدەر ەكى جۇلدىز سەكىلدى جارقىراي بەرەدى.
ۇرپاقتى ۇلىلىقتىڭ ۇلاعاتىن سەزىنە الارداي تاربيەلەسەك, قاسيەتتى قازاق جۇرتىنىڭ دا باق-تالايى جانباق. داڭعازالىق پەن بوس ماقتاننىڭ ۋاقىتى وتكەنىن وسى ماقالانىڭ ءون بويىنان بايقادىم. توي وتكىزۋدىڭ دە جاڭا فورمالارىن ىزدەۋ كەرەك شىعار.
ەل باسشىسى پاراسات بيىگىنەن وي تولعاپتى. جۇرەككە جەتەر قاراپايىم قاعيدا.
عالىم جايلىباي,
اقىن, قازاقستاننىڭ ەڭبەك سىڭىرگەن قايراتكەرى