سوعىستان دا, ەڭبەكتەن دە وردەنى بار

جاقىندا  95 جاسقا تولاتىن­ اق­ساقال بۇگىندە سىرتقا كوپ شىق­پايدى. ويتكەنى سوناۋ سوعىستىڭ جۇ­رەككە سالعان سالماعى ءالى كۇنگە اۋىر, ءارى ىستىققا دا, سۋىققا دا ءتوزىپ, قاندى شايقاستا دا, قار­قىندى ەڭبەكتە دە بار كۇش-قاي­راتىن ايانباي جۇمساعاندىقتان, سونداي-اق قارتتىعى «قاماۋعا» العاندىقتان ءار-ءار جەرى اۋىرادى, تاياققا سۇيەنىپ جۇرەدى.

دەگەنمەن, قۇرمەتتەپ ۇيىنە كەلىپ سالەم بەرگەندەر مەن نە­مەرە-شوبەرەلەرىنە  اسىقپاي ايتاتىن اسەرلى اڭگىمەسى جەتىپ ارتىلادى. سەبەبى ويىنداعى وتتى  كۇن­دەر مەن كوڭىلىندەگى كوپ يگى ىستەر كومەسكى تارتپاعان, باسىنان كەش­كەنىنىڭ ءبارىن ەسكىرتپەي ەسىنە الادى...

چايكە اتامىز 1925 جىلى 5 مامىردا قاسكەلەڭ (قازىرگى قاراساي) اۋدانىنداعى ەڭبەكشى اۋىلىندا تۋعان ەكەن. 1942 جىلى ناۋرىز ايىندا كومسومولعا وتەدى, ال تۋرا ءبىر جىلدان سوڭ اسكەري كوميسسارياتتان شاقىرتۋ كەلەدى. مۇنان كەيىن پەتروپاۆل قالاسىندا ءۇش اي ايلىق دايىندىقتان وتىسىمەن, نەمىس فاشيستەرىمەن سو­عىسقا جىبەرىلگەن.

الاساپىرانعا تولى اۋىر جو­رىق جولدارى جاس جىگىتتى مو­گيلەۆ, جي­تومير قالالارىنا دەيىن اپارىپ, 1943 جىلى قازان ايىندا مينسك قالاسىنىڭ تۇبىندەگى ءبىر ايقاستا جارالانعان. 1944 جى­لى ناۋرىزدا ۋدمۋرتياداعى كيزنەر  ستانساسىنداعى گوسپيتال­دان شى­عىپ, قان مايدانعا قايتا ورالعان.

سودان بريانسك قالاسى, ليتۆا, شى­عىس پرۋسسيا, رۋمىنيا, كە­نيس­بەرگتەگى سوعىستارعا قاتىس­قان. 1945 جىلى اقپان ايىندا ەرلىگى ءۇشىن قىزىل جۇلدىز ور­دەنىمەن ناگرادتالعان. باسقا دا جاۋىنگەرلىك مەدالدارى بار. ايتقانداي, مايدان دالاسىندا تاعى دا ءبىر رەت جارالانىپتى.

سوعىستان سوڭ دا اسكەردە قىز­مەت ەتىپ, ەلگە تەك 1948 جىلى قاي­تىپتى. بەيبىت  ەڭبەكتە دە (قۇرى­لىسشى) بەرەكەلى ىسىمەن تانىل­عان ارداقتى اتامىز ەندى  كەۋ­دەسىنە ەڭبەك قىزىل تۋ ور­دەنىن جار­قىراتا تاعىپتى. ءبىر قى­زىعى, چايكە اتامىزدىڭ الدىڭعى قاتار­لى ەڭبەككەر رەتىندەگى سۋرەتى سول كەزدەگى وداقتىق «ترۋد» گازەتىنە جانە «قازاقستان ايەلدەرى» جۋرنالىنا شىعىپتى.

مارقۇم كەمپىرى كۇپان اجە كەم­پى­رەكقىزى ەكەۋى ءۇش ۇل, ەكى قىزدى جاقسى ادام ەتىپ وسىرگەن. ولار­­دان 12 نەمەرە, 20 شوبەرە كوردى.

مىنە, سۇراپىل سوعىستا گاۋبيتسا دەيتىن زەڭبىرەكتىڭ وقتاۋشىسى بول­عان, كەيىننەن شارۋاشىلىقتا الدى­مەن جىلقى باققان, ونان سوڭ قۇرىلىسشى رەتىندە كوپ جۇمىس تىندىرعان مايدانگەر قارت وسىنداي ءومىرى ونەگەلى, ءىسى ۇلگىلى جان.

جاساي بەرىڭىز, چايكە اتا!

بەرىكباي قادىقوۆ,

جۋرناليست

الماتى وبلىسى,

قاراساي اۋدانى