قازىرگىدەي جاعدايدا الەمدىك ءبىلىم جۇيەسى قاشىقتان وقىتۋدىڭ ءتيىمدى ەكەنىن ايتۋدا. ونلاين ساباقتار ەلىمىزدىڭ تسيفرلى دامۋداعى العىشارتتارىنىڭ ءبىرى. يۋنەسكو-نىڭ مالىمەتى بويىنشا, 107 ەلدە 861 ملن-نان استام وقۋشى بار, سونىڭ ىشىندە 12 مەملەكەت جەرگىلىكتى مەكتەپتەرىن جاپتى. ياعني مەكتەپتەردىڭ جابىلۋى دۇنيە جۇزىندەگى وقۋشىلاردىڭ 87 پايىزىنىڭ ءبىلىم ساپاسىنا قاتتى اسەر ەتپەك.
سول سەبەپتى يۋنەسكو دۇنيەجۇزىلىك ءبىلىم كواليتسياسىن ۇيىمداستىرماق, بۇل قاشىقتان وقىتۋدىڭ وزىق تاجىريبەلەرىن كەڭەيتۋگە جانە كەلەشەك ۇرپاقتىڭ ساپالى ءبىلىم الۋىنا بارلىق قولجەتىمدىلىكتى قامتاماسىز ەتەدى.
«ەلىمىز قاشىقتان وقىتۋعا دايىن با؟» دەگەن سياقتى ساۋالدار كوپشىلىك اتا-انالاردىڭ كوكەيىندە جۇرگەن ماسەلە. بىرىنشىدەن, ەلوردانىڭ وزىندە اتىن اتاپ, ءتۇسىن تۇستەمەسەك تە ءبىرسىپىرا مەكتەپ ءۇش اۋىسىمدى جۇيەدە وقيدى. ال باسقا ايماقتارداعى مەكتەپتەردىڭ الەۋەتى ودان دا مۇشكىل. ەكىنشىدەن, ەلىمىزدە 180 مىڭنان استام وقۋشىنى قاشىقتان وقىتۋعا قاۋقارىمىز جەتە مە؟! ۇشىنشىدەن, پەداگوگ جانە IT ماماندارىنىڭ تاپشىلىعى. مىسالى, ءبىر ءپان مۇعالىمى ءبىر سىنىپتىڭ 25-30 بالاسىن قامتۋى ءتيىس. ەندى, ەسەپتەپ كورىڭىز, ءبىر سىنىپتان 25 بالانى ون سىنىپقا كوبەيتسەك, ءبىر تاۋلىكتە مۇعالىم 250 بالاعا ونلاين رەجىمىندە ساباق وقىتۋدا. ال عالامتور جەلىسى ايتارلىقتاي ءماز ەمەس.
نۇر-سۇلتان قالاسىنداعى №61 ورتا مەكتەبىندە لابورانت قىزمەتىن اتقارۋشى ايگەرىم بەيسەنبايقىزى: «جۇمىلا كوتەرگەن, جۇك جەڭىل» دەگەندەي ۇجىم بولىپ بارىنشا بۇل جۇيەگە دايىندىق جۇمىستارىن جۇرگىزۋدەمىز. بۇل تۇستا مەكتەپ باسشىلىعى از قامتىلعان جانە كوپ بالالى وتباسىلارىنا كومپيۋتەرلەر مەن پلانشەتتەر (ولاردىڭ ناۋشنيكتەرىمەن بىرگە) تاراتۋدا. ونىڭ باسى-قاسىندا ءوزىم دە ءجۇرمىن», دەيدى.
قالاي ايتساق تا, اتا-انالار بۇل جۇيەگە مورالدىق تۇرعىدان بولسا دا دايىن بولۋى كەرەك. سەبەبى وقۋشىنىڭ ءبارى قازىر اتا-اناسىنىڭ جانىندا.
ەلورداداعى مەكتەپتىڭ جارتىسىنان استامى Zoom پلاتفورماسىنا كوشسە, ال الماتى قالاسىنداعى ءبىرتالاي مەكتەپ Daryn.online, Classroom جۇيەسىن قولدانۋدا. كەي مەكتەپتەر «بالاپان» تەلەارناسىندا وتەتىن ساباقتاردىڭ كەستەسىن الىپ تا ۇلگەرگەن. ءبىر مەكتەپتەر «ەلارنا» تەلەارناسىمەن تىكەلەي بايلانىسقا شىقپاق. شىنىندا بۇل ءىس مۇعالىم مەن اتا-انا بىرلەسىپ جۇمىس ىستەگەندە عانا تولىق جۇزەگە اسادى. ەكى جاققا دا جۇكتەلەر جاۋاپكەرشىلىك زور. ەندەشە الداعى كۇندى جاقسى ۇمىتپەن, جايدارى جارقىن جۇزبەن قارسى الايىق!.
ايىم بولاتقىزى