4 مامىردان باستاپ ورال قالاسىنداعى حالىققا قىزمەت كورسەتۋ ورتالىعى جۇمىسىن قايتا باستادى. 4-شاعىن اۋدانداعى «Ural Car City» عيماراتىنداعى ورتالىق ساعات 09:00-دەن 17:00-گە دەيىن قىزمەت كورسەتپەك. بۇل جەردە بۇعان دەيىن ەلەكتروندى فورماتتا قولجەتىمسىز بولعان, تەك «قاعاز» جۇزىندە كورسەتىلەتىن قىزمەتتەرگە جۇگىنۋگە بولادى.
دەگەنمەن 3 ساناتتاعى ازاماتتار, ياعني زەينەتكەرلەر, كوپ بالالى وتباسىلار جانە مۇگەدەكتەر ەلەكتروندىق قىزمەتتەردى حالىققا قىزمەت كورسەتۋ ورتالىعىنان الا الادى. فرونت-وفيستە ولار ءۇشىن جەڭىلدىك تەرەزەسى جۇمىس ىستەيدى. بىراق ولار ورتالىققا باراتىن ۋاقىتىن الدىن الا برونداۋى كەرەك.
جالپى, ورتالىقتا حالىق تىم كوپ شوعىرلانىپ, كورونوۆيرۋستىق ينفەكتسيا تاراپ كەتپەۋى ءۇشىن ازاماتتار ەلەكتروندىق ۇكىمەت پورتالى ارقىلى كەزەك الۋى ءتيىس.
«ورال قالاسىنىڭ №1 حقو بولىمىندە 120-دان استام قىزمەتكەر جۇمىسىن باستادى. ءبىزدىڭ حقو رەسپۋبليكا بويىنشا نۇر-سۇلتان, اقتاۋ, قاراعاندى قالالارىمەن بىرگە العاشقىلاردىڭ ءبىرى بولىپ جۇمىس ىستەي باستادى. تۇرعىنداردان ورتالىققا بارار كەزدە بەتپەردە كيۋىن سۇرايمىن», – دەدى «ازاماتتارعا ارنالعان ۇكىمەت» مەملەكەتتىك كورپوراتسياسى بقو فيليال ديرەكتورى مارات باسساروۆ.
ايتا كەتەيىك, كارانتين كەزىندە حالىققا قىزمەت كورسەتۋ ورتالىقتارى ءوز قىزمەتىنىڭ 80%-ىن ەلەكتروندى فورماتتا بەرە باستاعان ەدى. وسى ۋاقىتتا باتىس قازاقستان وبلىسى بويىنشا 6 مىڭنان استام دايىن قۇجات بەرىلگەن. سونىڭ ىشىندە 26 ناۋرىزدان 29 ساۋىرگە دەيىن 1750 كۋالىك, 594 تولقۇجات, 258 جۇرگىزۋشى كۋالىگى, سونىمەن قاتار باسقا دا 1341 قۇجات ءتۇرى – ازاماتتىق حال اكتىلەرىن تىركەۋ قۇجاتتارى, كولىكتىڭ تەحنيكالىق تولقۇجاتى مەن تىركەۋ نومىرلەرى, جىلجىمايتىن م ۇلىك پەن جەر تەلىمدەرىنىڭ قۇجاتتارى بەرىلگەن. بۇل قۇجاتتاردىڭ باسىم بولىگى كارانتين بارىسىندا ونلاين راسىمدەلگەن.
باتىس قازاقستان