بۇل تۋرالى قر قارۋلى كۇشتەرى باس شتابىنىڭ ۇيىمداستىرۋ, جۇمىلدىرۋ جۇمىستارى دەپارتامەنتىنىڭ باسشىسى ساكەن ءجۇسىپوۆ حابارلادى.
«اسكەري قىزمەت جانە قىزمەتشىلەردىڭ مارتەبەسى تۋرالى قر زاڭىنا سايكەس قارۋلى كۇشتەردىڭ جاۋىنگەرلىك ازىرلىگىن قولداۋ ماقساتىندا توتەنشە جاعداي كەزىندە 2019 جىلدىڭ كوكتەمىندە اسكەرگە شاقىرىلعان مەرزىمدى قىزمەتتەگى اسكەري قىزمەتشىلەردى زاپاسقا شىعارۋ ۋاقىتشا توقتاتىلدى. زاپاسقا شىعارىلعانعا دەيىن وسى اسكەري قىزمەتشىلەردى كيىم-كەشەكپەن, ازىق-ت ۇلىكپەن, قارجى جانە مەديتسينالىق قامتاماسىز ەتۋ ءتارتىبى ساقتالادى. سونىمەن قاتار, بارلىق وڭىردە اسكەري شاقىرۋ جانە مەديتسينالىق كوميسسيالاردىڭ جۇمىستارى توقتاتىلدى. وسىعان بايلانىستى مەملەكەت باسشىسى ازاماتتاردى مەرزىمدى اسكەري قىزمەتكە شاقىرۋ مەرزىمدەرىن 2020 جىلعى ماۋسىمنان تامىزعا اۋىستىرۋ تۋرالى جارلىققا قول قويدى. جارلىقتا ازاماتتاردى اسكەرگە شاقىرۋدىڭ بۇدان بۇرىن بەكىتىلگەن مەرزىمىن اعىمداعى جىلدىڭ ماۋسىمىنان تامىزعا دەيىن ۇزارتۋ كوزدەلەدى», - دەدى س. ءجۇسىپوۆ.
ونىڭ ايتۋىنشا, ازاماتتاردى اسكەرگە شاقىرۋ تج رەجيمى الىنعاننان كەيىن قايتا جۇرگىزىلەدى جانە 31 تامىزعا دەيىن ۇزارتىلادى. 2019 جىلى كوكتەمدە اسكەرگە شاقىرىلعان اسكەري قىزمەتشىلەردى زاپاسقا شىعارۋ تج رەجيمى الىنعان جاعدايدا اعىمداعى جىلدىڭ 30 ماۋسىمىنا دەيىن جۇرگىزىلەدى.
«ەلىمىزدە تج ەنگىزگەن ساتتەن باستاپ, قارۋلى كۇشتەر ءارتۇرلى مىندەتتەردى بەلسەنە اتقارۋدا. بۇگىنگى تاڭدا 9500 اسكەري قىزمەتشى پاترۋلدەۋدى, دەزينفەكتسيالاۋدى جانە باسقا دا مىندەتتەردى ىسكە اسىرۋدا. اسكەري قىزمەتتىڭ بەلگىلەنگەن مەرزىمىن وتكەرگەن, مەرزىمدى قىزمەت اسكەري قىزمەتشىلەرىن زاپاسقا شىعارۋدى توقتاتا تۇرۋ جانە ازاماتتاردى اسكەرگە شاقىرۋ مەرزىمىن اۋىستىرۋ تۋرالى شەشىم ءبىزدىڭ مەملەكەتىمىزدىڭ تاريحىندا العاش رەت قابىلدانىپ وتىر. ازاماتتارىمىزدىڭ قاۋىپسىزدىگىن قامتاماسىز ەتۋگە باعىتتالعان. ورىن العان جاعدايعا تۇسىنىستىكپەن قاراۋدى سۇرايمىز», - دەدى ساكەن ءجۇسىپوۆ.