مەديتسينا قىزمەتكەرلەرىنىڭ ءال-اۋقاتىن ەستەن شىعارمايمىز - مينيستر

«كەشە جينالىس وتكىزىپ, ماسەلە بويىنشا نەگىزگى ساراپشىلاردى تىڭدادىم. شتابتا ءبىز الماتىداعى ورتالىق قالالىق اۋرۋحاناسىندا دارىگەرلەردىڭ جاپپاي ۆيرۋس جۇقتىرۋ جاعدايىن تاعى ءبىر رەت تالقىلادىق. شتاب جۇمىسىنىڭ قورىتىندىسى بويىنشا ارىپتەستەرىممەن ونلاين رەجيمدە كەزدەسۋدى ۇيعاردىم. كەشكە وسى ەمحانانىڭ دارىگەرلەرىمەن سويلەستىم. تۋىنداعان ماسەلەلەردى تىڭداپ, اڭگىمە وربىتتىك. كەزدەسۋگە الماتى قالاسى اكىمىنىڭ ورىنباسارى ەرجان باباقۇماروۆ, ەڭبەك جانە حالىقتى الەۋمەتتىك قورعاۋ مينيسترلىگىنىڭ, الماتى قالالىق دەنساۋلىق ساقتاۋ باسقارماسىنىڭ باسشىسى, كاسىپوداقتاردىڭ دەنساۋلىق ساقتاۋ ۇيىمدارىنىڭ وكىلدەرى جانە اۋرۋحانانىڭ مەديتسينا قىزمەتكەرلەرى قاتىستى», - دەپ جازدى مينيستر Facebook پاراقشاسىندا.

ءمينيستردىڭ جازۋىنشا, اۋرۋحانانىڭ قىزمەتكەرلەرى ۇستەمەاقى الۋ تۋراسىندا جازبا قالدىرعان. ءوز سوزدەرىندە ولار ۆيرۋستى ناۋقاستاردان جۇقتىرعانىن كورسەتكەن. «وسىعان بايلانىستى اۋرۋحانا قىزمەتكەرلەرى وتەماقى الۋعا ۇمىتتەنىپ وتىر. ولاردىڭ ءاربىر ءوتىنىشىن جەكە قاراستىردىق. وسى ماسەلەگە قاتىستى جاعدايدىڭ كۇردەلىلىگىن ەسكەرىپ, الۋان ءتۇرلى پىكىردى تىڭداپ, مەن جەرگىلىكتى اتقارۋشى ورگاندى (اكىمدىك) جانە قالالىق دەنساۋلىق ساقتاۋ باسقارماسىن ەڭبەك جانە حالىقتى الەۋمەتتىك قورعاۋ مينيسترلىگىنىڭ 2020 جىلدىڭ 9 ساۋىرىندەگى №129 بۇيرىعىنا تاعى ءبىر رەت نازار اۋدارۋعا شاقىردىم. ول بۇيرىقتا الدىڭعى قاتارداعى دارىگەرلەرگە تولەنەتىن جاعدايلاردى, جۇمىس ورنىنداعى ينفەكتسيالار ءۇشىن سىياقىلاردىڭ جاعدايلارىن زەرتتەيتىن جانە تۇپكىلىكتى شەشىم قابىلداۋعا مۇمكىندىك بەرەتىن كوميسسيالاردى قۇرۋعا بارلىق وكىلەتتىك بەرىلگەن», - دەپ جازادى مينيستر.

مينيستر تاۋەلسىز كوميسسيانىڭ قۇرامىنا اكىمدىكتىڭ وكىلدەرى, تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ (وبلىستىڭ باس مەملەكەتتىك سانيتارلىق دارىگەرى) وكىلدەرى, وبلىستىڭ, رەسپۋبليكالىق ماڭىزى بار قالانىڭ جانە استانانىڭ دەنساۋلىق ساقتاۋ جونىندەگى جەرگىلىكتى مەملەكەتتىك ورگانىنىڭ, جۇمىسپەن قامتۋ جانە الەۋمەتتىك قورعاۋ جونىندەگى جەرگىلىكتى باسقارما نەمەسە ءبولىمنىڭ, «Nur Otan» پارتياسى, مەديتسينا قىزمەتكەرلەرىنىڭ مۇددەلەرىن بىلدىرەتىن ۇكىمەتتىك ەمەس ۇيىمداردىڭ وكىلدەرى كىرەتىنىن ەسكە سالدى.

«قوعامدىق پىكىر كوشباسشىلارىن, جۋرناليستەردى پىكىرتالاسقا قاتىسۋعا شاقىرامىن. ماسەلەنىڭ شەشىمىن تابۋ ءۇشىن بۇل جەردە ەڭ الدىمەن اشىقتىق كەرەك. تاعى ءبىر ماڭىزدى ماسەلە – ەگەر مەديتسينالىق قىزمەتكەر كوروناۆيرۋس ينفەكتسياسىن جۇقتىرۋدىڭ سالدارىنان كارانتيندە بولسا, ولار كىرىس كوزىنەن ايىرىلماۋى كەرەك. ءبارى دە زاڭعا ساي تولەنۋى ءتيىس», - دەدى ول.

ەلجان ءبىرتانوۆتىڭ ايتۋىنشا, كوميسسيا توراعاسى سول كوميسسيا مۇشەلەرىنىڭ بەرگەن داۋىسى بويىنشا سايلانادى. كوميسسيا توراعاسى رەتىندە اكىمدىك قىزمەتكەرىن, اتاپ ايتقاندا اكىمنىڭ ورىنباسارى دەڭگەيىندەگى ادامدى سايلاۋعا كەڭەس بەرىلىپ وتىر.

«وسى كوميسسيا شەشىمىنەن كەيىن عانا تولەمدەر بويىنشا ناقتى شارا قابىلدانادى. جەرگىلىكتى اتقارۋشى ورگاننىڭ جانە دەنساۋلىق ساقتاۋ باسقارماسىنداعى ارىپتەستەردەن تاعى دا سۇرايمىن: دارىگەرلەرگە قيىن كەزدەردە تۋىنداعان پروبلەمالاردى شەشۋگە كومەكتەسۋ ءۇشىن ماسەلە تەز ارادا شەشىلسە دەيمىز. ىندەتكە قارسى كوستيۋمدەر ماسەلەسىن جاقىن ارادا تەكسەرەمىز. بۇل جەردە كەز-كەلگەن اۋرۋحانا باسشىلىعى ءوزىنىڭ مەديتسينالىق قىزمەتكەرلەرىن جەكە قورعانىس قۇرالدارىمەن قامتاماسىز ەتۋگە مىندەتتى ەكەنىن اتاپ وتكىم كەلەدى. قۇرمەتتى مەديتسينا سالاسىنداعى ارىپتەستەر, سىزدەن كوميسسيا شەشىمى شىققانعا دەيىن تىنىشتىق ساقتاۋىڭىزدى سۇرايمىن. ءسىز كارانتيندە ەم قابىلداپ جاتىرسىز. دەنساۋلىعىڭىزعا مۇقيات قاراڭىز. تولىق ساۋىعۋ ءۇشىن بارلىق ساقتىق شاراسىن قابىلداڭىز! ءسىز ەلگە كەرەكسىز! كەرىسىنشە ءبىز مەديتسينا قىزمەتكەرلەرىنىڭ ءال-اۋقاتىن ەستەن شىعارعان ەمەسپىز. مەن كەز كەلگەن مەديتسينا قىزمەتكەرىنە قۇلاق اسىپ, ونى قورعاۋعا دايىنمىن! كەزدەسۋ قورىتىندىسىنان كەيىن ول نيەتىمدى تۇسىندىڭىزدەر دەگەن ويدامىن. بارىڭىزگە راحمەت!», - دەدى ەلجان ءبىرتانوۆ.