ءساتى ءتۇسىپ پاۆلودار وبلىسىنداعى شالداي اۋىلىنا بارعان ساپارىمدا نۇرۇموۆتاردىڭ شاڭىراعىنا اتباسىن بۇردىم. كوپ بالالى وتباسى يەلەرى قايرات پەن گۇلنار جۇزدەرى اقجارقىن, حالىقتىڭ العىسىنا بولەنگەن جاندار ەكەن. ەرلى-زايىپتىلار ەل تاۋەلسىزدىگىنىڭ العاشقى جىلدارىندا بالالار ۇيىنەن ءۇش ءسابي اسىراپ الىپ, ءوز شاڭىراعىنداعى بەس قىزدىڭ ورتاسىنا قوسىپ, تاربيەلەپتى.
– ءبىزدىڭ شالداي اۋىلىنداعى بالالار ءۇيى جابىلادى, ال سابيلەردى باسقا جەرگە الىپ كەتەدى ەكەن دەگەن سىبىستى ەستىپ, جۇبايىم گۇلنار ەكەۋىمىز اقىلداسىپ, جەتىم بالالاردى اسىراپ الماقشى بولدىق. بالالار ءۇيى باسشىلارىنىڭ ايتۋىنا قاراعاندا, اپالى-ءسىڭلىلى نينا, وليا, ماشا كوندراتەۆالاردى جاس ايىرماشىلىقتارىنا بايلانىستى ءۇش مەكەمەگە ءبولىپ جىبەرمەك بولعان. ءبىز ءبىر اكە-شەشەدەن ءوسىپ-ونگەن وسى قىزداردى وتباسىمىزعا الامىز دەپ شەشتىك, – دەيدى بۇل جونىندە قايرات اعانىڭ ءوزى.
– شىنىنا كەلسەك, باسىندا قيىن بولدى, – دەيدى گۇلنار اپاي اعىنان جارىلىپ. – العاشىندا بالالار ءبىر-ءبىرىن تۇسىنبەي, سوزگە كەلىپ قالا بەرەتىن. ۋاقىت وتە كەلە ولار باۋىرمال بولا باستادى. وسىلايشا ءاليا, ءمادينا, ليليا, ءنايلا, ءاسيا, نينا, وليا, ماريالار ءبىر ءۇيدىڭ بالاسىنداي بولىپ بويجەتتى. بۇگىندە تەك ءنايلا مەن ءاسيا عانا مەكتەپ وقۋشىلارى. نينا وقۋ ورنىن ءتامامداپ پاۆلودار وبلىسى, شارباقتى اۋدانىنداعى قورعانىس جونىندەگى باسقارماسىندا جۇمىس ىستەيدى. وليا مەن ماريا – كوللەدجدىڭ ستۋدەنتتەرى. قۇداي قالاسا, ءارى قاراي وقيمىز دەسە, قولدان كەلگەننىڭ ءبارىن جاسايمىز, تۇرمىس قۇرامىز دەسە, تويىن جاسايمىز.
قايرات پەن گۇلنار ۇلكەن قىزدارى ءاليا جانە ءمادينادان يمران, اريا اتتى جيەن ءسۇيىپ وتىر. قازاقتا «جاقسىلاردىڭ كوڭىلى – التىن ساندىق» دەگەن جاقسى ءسوز بار. وسى ءسوز جۇرەكتەرى سىرلى, يمانى توگىلگەن قايرات پەن گۇلنار نۇرۇموۆتارعا ارنالىپ ايتىلعانداي. ەندى ولاردىڭ بۇل يگى تىرلىگى باسقالارعا ۇلگى-ونەگە بولسا ەكەن.
ساپارعالي جاعىپاروۆ,
اسكەري جۋرناليست
پاۆلودار وبلىسى