«دجيرو د'يتاليا» ۆيرتۋالدى ۆەلوجارىسىنىڭ ءتورتىنشى كەزەڭى ءوز مارەسىنە جەتتى. ونلاين دودانىڭ كەزەكتى كەزەڭىندە باق سىناعان «استانا» ۆەلوكومانداسىنىڭ سپورتشىلارى گوركا يساگيررە مەن الەكس ارانبۋرۋ العاشقى ۇشتىكتىڭ قاتارىنان كورىندى.
ءتورتىنشى كەزەڭدە ۆەلوسپورتشىلار بيىل ءوتۋى كەرەك بولعان «دجيرو د'يتاليا-2020» باسەكەسىنىڭ 17-كەزەڭىندەگى 25,9 شاقىرىم قاشىقتىقتى كومپيۋتەرگە قوسىلعان ۆەلوستانوكپەن ءجۇرىپ ءوتتى. بۇل اينالىمدا «Bahrain – McLaren» ۆەلوسپورتشىلارى جارىس جەڭىمپازى اتاندى. ەكىنشى ورىندى «استانا» وكىلدەرى يەلەنسە, ۇزدىك ۇشتىكتى «Jumbo-Visma» كومانداسى تۇيىندەدى.
جالپى ەسەپتە قازاقستاندىق كوماندا كوش باستاپ كەلەدى. ەكىنشى ورىندا «استانادان» 18,33 ۋاقىت كورسەتكىشىمەن قالىپ كەلە جاتقان «Bahrain – McLaren» بولسا, ءۇشىن ورىندا يتاليا قۇراماسىنان جينالعان ۆەلوسپورتشىلار كەلەدى. ولار جەرلەستەرىمىزدەن 20,33 مينۋت ارتتا كەلەدى. ايتا كەتەيىك, جارىستىڭ العاشقى كەزەڭىندە الەكسەي لۋتسەنكو جەڭىمپاز اتانعان بولاتىن.