مەملەكەت باسشىسى ق.توقاەۆ قازاقستان حالقىنا جاساعان مالىمدەمەسىندە توتەنشە جاعداي رەجىمىن 11 مامىرعا دەيىن ۇزارتۋعا شەشىم قابىلدانعانىن جاريالادى, سەبەبى ەلىمىزدە COVID-19 ىندەتىنىڭ قاۋپى ءالى سەيىلىپ بىتكەن جوق. ءبىز وسى جاعدايعا بايلانىستى پرەزيدەنتتىڭ شەشىمىن قولدايمىز. بۇل الدىڭعى دەر كەزىندە قابىلداعان شارالاردى تولىقتىراتىنىن اتاپ كەتكىم كەلەدى.
COVID-19 ىندەتى الەمنىڭ شارتارابىنا تارالۋى سالدارىنان ادامزات ومىرىنە توتەننەن قاۋىپ ءتونىپ, جەر-جاھاندا وسى ىندەتتەن ءجۇز مىڭداعان ادام اجال قۇشىپ جاتقان كەزدە بارلىق جەردە قاۋىپسىزدىك شارتىن قاتاڭ ساقتاعان ابزال. بۇگىندە ەلىمىزدە ىندەتپەن كۇرەس شارالارىنىڭ بارلىعى پرەزيدەنت ق.توقاەۆتىڭ تىكەلەي باسشىلىعىمەن ىسكە اسۋدا جانە تولىق قاداعالاۋدا. مەملەكەت باسشىسىنىڭ جارلىعىمەن 16 ناۋرىزدان باستاپ ەلىمىزدە توتەنشە جاعداي جاريالانعانى بەلگىلى.
ەلىمىزدە قاتاڭ كارانتين شارالارى ەنگىزىلگەن سوڭ مەكەمەلەر مەن كاسىپورىنداردىڭ كوپشىلىگى قاشىقتان جۇمىس ىستەۋ تارتىبىنە كوشتى, جوعارى وقۋ ورىندارى, كوللەدجدەر, جالپى ءبىلىم بەرەتىن مەكتەپتەر قاشىقتان ءبىلىم بەرۋدى جۇزەگە اسىرۋدا. مەملەكەت تاراپىنان ادامداردىڭ دەنساۋلىعىن ساقتاۋ, ۆيرۋس جۇقتىرعانداردى ەمدەۋ جانە ادامداردى ودان ساقتاندىرۋ, الدىن الۋ شارالارى قارقىندى جۇرگىزىلۋدە.
پرەزيدەنت ءسوزى بۇكىل حالقىمىزدى قاناتتاندىرا ءتۇستى. شىنىندا دا ءبىز ارقاسۇيەر مەملەكەتى, جول كورسەتەر دانا باسشىسى, قامقور پرەزيدەنتى بار تاۋەلسىز ەل ەكەنىمىزگە قۋانامىز. ويتكەنى قازىرگىدەي وتە كۇردەلى كەزەڭدە مەملەكەتىمىزدىڭ قازاقستان حالقىنا جاساپ وتىرعان قامقورلىعى ۇشان-تەڭىز.
پرەزيدەنت اتاپ كورسەتكەندەي, بۇگىنگە دەيىن ەلىمىز بويىنشا 4 ملن 250 مىڭ ازاماتقا قارجىلاي كومەك كورسەتىلدى. 570 مىڭنان استام ادامعا ازىق-ت ۇلىك تاراتىلدى. جالپى, 1,1 ملن-نان استام ادامدى ازىق-ت ۇلىكپەن قامتاماسىز ەتۋ جوسپارلانۋدا. ءساۋىر-مامىر ايلارىندا 1,6 ملن-نان استام ادامعا كوممۋنالدىق تولەم ءۇشىن كومەك كورسەتىلەدى. ازىق-ت ۇلىكتىڭ جەتكىلىكتى بولۋىنا جانە ونىڭ ساپاسىنا قاتىستى ۇدايى مونيتورينگ جۇرگىزىلۋدە. ىندەتپەن كۇرەستىڭ الدىڭعى شەبىندە جۇرگەن دارىگەرلەرگە قارجىلاي قولداۋ كورسەتىلۋدە. 1,6 ملن-نان استام ادام, 11,5 مىڭ شاعىن جانە ورتا بيزنەس وكىلدەرى نەسيەلەرىن كەيىن تولەۋگە مۇمكىندىك الدى. بۇل, جالپى العاندا, 360 ملرد-تان استام تەڭگەنى قامتيدى. بۇگىندە شاعىن جانە ورتا بيزنەس كۇردەلى جاعدايعا تاپ بولىپ وتىرعاندىقتان, قازىر 700 مىڭنان استام كومپانيا مەن جەكە كاسىپكەرگە سالىقتىق جەڭىلدىكتەر جاسالۋدا. اۋىل شارۋاشىلىعىن قولداۋ, كوكتەمگى ەگىس ناۋقانىن ۋاقتىلى اتقارۋ ءۇشىن, سونداي-اق شارۋالاردىڭ بولاشاق ونىمدەرىن ساتىپ الۋ ءۇشىن 200 ملرد تەڭگە ءبولىندى.
ۆيرۋس جۇقتىرعان دارىگەرلەر مەن ءتارتىپ ساقشىلارىنا كورسەتىلەر قامقورلىق تا اۋقىمدى. مۇنىڭ ءوزى مەملەكەتىمىزدىڭ ءوز ادامدارىنا دەگەن جاناشىرلىعىمەن قامقورلىعىنىڭ جارقىن كورىنىسى. سوندىقتان حالقىمىز ەلباسىمىز ن.ءا.نازارباەۆ پەن پرەزيدەنتىمىز ق.ك.توقاەۆقا شىن جۇرەكتەن العىس ايتۋدا.
مەملەكەت باسشىسىنىڭ قايتا-قايتا بۇقارالىق اقپارات قۇرالدارىندا, ءوز ۇندەۋلەرى مەن مالىمدەمەلەرىندە حالىقتى ۆيرۋستان ساقتانۋعا, وتباسىن, بالا-شاعاسىن ىندەتتەن قورعاۋعا دامىلسىز شاقىرۋى ونىڭ زور ادامگەرشىلىگى مەن ەل اعاسى رەتىندەگى كىسىلىك كەلبەتىنىڭ ايقىن كورىنىسى ەكەنى ءشۇباسىز.
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ۇجىمى دا ەلىمىزدە جاريالانعان توتەنشە جاعداي مەن كارانتيندىك تالاپتارعا سايكەس وقۋ ۇدەرىسىن قاشىقتان وقىتۋ جۇيەسىندە جۇزەگە اسىرۋدا. بارلىق ءبىلىم الۋشىلار ۋنيۆەرسيتەتتىڭ اقپاراتتىق Univer, Moodle جۇيەلەرى ارقىلى قاجەتتى وقۋ كونتەنتىن الىپ, تاپسىرمالاردى دەر كەزىندە ورىنداۋعا مۇمكىندىك الدى. الدىمىزدا كوكتەمگى ەمتيحان سەسسياسىن ۇيىمداستىرۋ ماسەلەسى تۇر. بۇل جەردە دە ۋنيۆەرسيتەت تولىق دايىندىقتا وتىر. ۋنيۆەرسيتەتتىڭ عىلىمي كەڭەسىنىڭ شەشىمىمەن كوكتەمگى سەسسيا ءوز مەرزىمىندە قاشىقتان ونلاين-تەست جانە شىعارماشىلىق پاندەر بويىنشا ەمتيحاندار بەينەكونفەرەنتسيا فورماتىندا وتكىزىلىپ, اكادەميالىق ادالدىقتى باقىلاۋ ءۇشىن پروكتورينگ جۇيەسى پايدالاناتىن بولدى. سونىمەن قاتار ءبىلىم جانە عىلىم مينيسترلىگىنىڭ ۇسىنىسى مەن ۋنيۆەرسيتەتتىڭ كوپتەگەن ستۋدەنتتىڭ وتىنىشتەرىنە سايكەس اعىمداعى باعالار نەگىزىندە ەمتيحان باعاسىن قويۋ تۋرالى شەشىم قابىلداندى.
سونىمەن بىرگە ستۋدەنتتەردىڭ وتىنىشتەرىنە سايكەس, وقۋ اقىسىن تولەۋ مەرزىمى مامىر ايىنىڭ سوڭىنا دەيىن ۇزارتىلدى جانە كەيبىر ستۋدەنتتەرگە قوسىمشا جەڭىلدىك بەرىلەتىن بولدى.
وسى كەزەڭدە, مەملەكەت باسشىسىنىڭ ءبىلىم بەرۋدەگى جانە الەۋمەتتىك ماسەلەلەر بويىنشا تاپسىرمالارىن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ۇجىمى تولىق ورىنداپ جاتىر دەپ ايتامىز.
باستالۋى بار ءار نارسەنىڭ اياقتالۋى دا بولاتىنى ءسوزسىز. الەمدى دۇرلىكتىرگەن ىندەت دۇربەلەڭىنىڭ دە ءبىر كۇندەرى توقتايتىنى انىق. سول كەزدە بۇكىل حالقىمىز ادام ءومىرى ءۇشىن بولعان وسىناۋ زور مايداندا ەرلەرشە قايرات كورسەتكەن پرەزيدەنتىمىز بەن ازاماتتارىمىزدىڭ ەرەن ەڭبەگىن ماقتانىشپەن ايتاتىن بولادى.
تاكير بالىقباەۆ,
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى, پروفەسسور