وسى سەكىلدى تۇرعىنداردى تولعاندىرعان ماسەلەلەرمەن تانىسۋ ءۇشىن شىمكەنت قالاسىنىڭ اكىمى مۇرات ايتەنوۆ شاھارداعى بىرقاتار شاعىن اۋدانداردى ارالاپ كوردى. اۋەلى ءنۇرسات شاعىن اۋدانىنا بارعان قالا اكىمى ونداعى كوپقاباتتى تۇرعىن ۇيلەردىڭ ساۋلەتتىك جوباسىمەن تانىستى. انىعىندا, مولتەك اۋدانداعى №18, 19 كوپقاباتتى ۇيلەردىڭ سىرتقى قاسبەتى سىن كوتەرمەيدى. 2016 جىلى سالىنعان تۇرعىن ۇيلەردىڭ قابىرعالارىنىڭ ءارى كوشىپ, جاۋىن-شاشىنعا شىداس بەرمەي تۇسە باستاعان. ماسەلەنى تالايدان بەرى قوزعاپ جۇرگەن ءۇي تۇرعىندارىمەن قالا اكىمى مۇرات دۇيسەنبەك ۇلى كەزدەسىپ, شاعىمدارىن تىڭدادى.
كەزدەسۋ بارىسىندا قۇرىلىس باسقارماسىنىڭ باسشىسى ەربول احمەتوۆ كوپقاباتتى ۇيلەردىڭ قۇرىلىسىن الماتىلىق قۇرىلىس كومپانياسى جۇرگىزگەنىن ايتتى. مەردىگەردىڭ تۇرعىن ۇيگە 5 جىلدىق كەپىل مەرزىمى دە اياقتالماعان. الايدا, بۇگىندە اتالعان كومپانيا جۇمىسىن توقتاتقان. بىراق زاڭدى تۇردە بانكروت دەپ جاريالانباپتى. سول سەبەپتى, قالانىڭ قۇرىلىس باسقارماسى مەردىگەردى سوتقا بەرىپ جەڭىپ شىققان.
«قازىر سالا ماماندارىمەن جانە قۇرىلىس كومپانيالارىمەن سويلەسىپ, سىرتىنا جوندەۋ جۇمىستارىن جۇرگىزۋدىڭ ءتۇرلى جولدارىن قاراستىرىپ جاتىرمىن. بۇل ۇيلەردىڭ سىرتىن جوندەپ بەرەمىن. سەبەبى, مەردىگەردىڭ قاتەلىگىنە تۇرعىندار كىنالى ەمەس. سابىرلىق تانىتىڭىزدار, دەمەۋشىلەرمەن دە سويلەسىپ جان-جاقتى قاراستىرىپ جاتىرمىن» دەدى قالا اكىمى.
بۇدان كەيىن شاھار باسشىسى قايتپاس-1 شاعىن اۋدانىنا باردى. مۇنداعى تۇرعىندار ساپاسى تومەن جەكەمەنشىك جارىق جۇيەسىنە شاعىمدانىپ وتىر. بۇدان بولەك جول, اۋىز سۋ, گاز, قوعامدىق كولىك ماسەلەسى وزەكتى ەكەنىن ايتادى حالىق. ءوز كەزەگىندە مۇرات دۇيسەنبەك ۇلى تۇرعىندار كوتەرگەن ماسەلەلەر كەزەڭ-كەزەڭىمەن شەشىلەتىنىن جەتكىزدى.
«سىزدەردىڭ قۋاتى ءالسىز جەكەمەنشىك ەلەكتر ەنەرگياسىن تۇتىنىپ وتىرعاندارىڭىزدان حاباردارمىن. كەزىندە وسىنداعى 416 ۇيگە جارىق جۇيەسى جەتپەي قالعان ەكەن. سونى ەسكەرىپ, قۋات جۇيەسىن جۇرگىزۋگە بايقاۋ وتكىزىپ, مەردىگەر مەكەمەنى انىقتادىق. جۋىردا ولار جۇمىسىن باستايدى. قۇرىلىس جۇمىستارىن كۇزگە دەيىن بىتىرۋگە ارەكەت جاسايمىز. سوندا سىزدەردە ساپالى ەنەرگيا بولادى. ال, سۋ, گاز تارتۋ ماسەلەسىنە كەلسەك, جۋىردا جوبالىق سمەتاسىن جاسايمىز. بيىل جۇمىستاردى باستاۋعا تىرىسامىز» دەيدى مۇرات ايتەنوۆ.
قوعامدىق كولىك جۇمىسىنا قايتا زەردەلەۋ جۇمىستارى جاسالىپ جاتقانىن ايتادى قالا اكىمى. جاز ايلارىنا قاراي اۆتوبۋستار ماسەلەسى دە ءوز شەشىمىن تاپپاق.
شىمكەنت