پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا ىشكى اۋە رەيستەرىن قايتا ىسكە قوسقان سوڭ سانيتارلىق-كارانتيندىك باقىلاۋدى كۇشەيتۋ بارىسى تۋرالى ءباسپاسوز ءماسليحاتى ءوتتى.
ەلدەگى جاعداي سالىستىرمالى تۇردە تۇراقتانعانىن ەسكەرە وتىرىپ, 1 مامىردان باستاپ ەلوردا مەن الماتى اراسىنداعى رەيستەر اشىلاتىنى بەلگىلى. ايتسە دە, ەركىنسۋگە ءالى ەرتە. مەملەكەت ءۇشىن ەل ازاماتتارىنىڭ دەنساۋلىعى ماڭىزدى. سوعان وراي كولىكتەگى تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى, كولىكتەگى باس مەملەكەتتىك سانيتارلىق دارىگەر سادۋاقاس بايعابىلوۆ ۇشاققا مىنەتىن جولاۋشىلاردىڭ ارنايى انىقتاما قاعازى بولۋى كەرەكتىگىن ەسكەرتتى.
– ىشكى اۆيارەيستەر اشىلسا دا, سانيتارلىق-كارانتيندىك باقىلاۋ كۇشەيتىلەدى. ۇشاققا بيلەت الماس بۇرىن Covid-19 پاندەمياسىنىڭ بەلگىلەرى جوقتىعى تۋرالى انىقتاما الۋىڭىز قاجەت. ول ءۇشىن جول جۇرەر مەرزىمىڭىزدەن ەرتەرەك تەكسەرىلگەنىڭىز ابزال. بۇل انىقتاما 1 اپتاعا جارامدى. سول ۋاقىتتا كەرى قايتىپ ۇلگەرۋ كەرەك, – دەدى س.بايعابىلوۆ.
كوروناۆيرۋس جۇقتىرماعانى تۋرالى انىقتاما قۇنى 11500 تەڭگەنى قۇراماق. ال جەكە تەستىلەۋ ورتالىقتارىندا 19-20 مىڭ تەڭگە كولەمىندە بولادى.
ءباسپاسوز ءماسليحاتى بارىسىندا كولىكتەگى تاۋارلار مەن قىزمەتتەردىڭ ساپاسى جانە قاۋىپسىزدىگىن باقىلاۋ دەپارتامەنتىنىڭ سانيتارلىق-كارانتيندىك پۋنكتتەرىنىڭ باسشىسى داريا ازىمباەۆا جولاۋشىلار مىندەتتى تۇردە بەتپەردە مەن مەديتسينالىق قولعاپ كيۋى كەرەكتىگىن ايتتى.
– بۇل مىندەتتەر دەپارتامەنت باسشىسىنىڭ قاۋلىسىنا سايكەس جۇزەگە اسىرىلادى. سانيتارلىق-كارانتيندىك باقىلاۋ ءبولىمىنىڭ ماماندارى تەرمومەتر ارقىلى جولاۋشىلاردىڭ تەمپەراتۋراسىن باقىلاۋدا ۇستايدى. اۋە رەيستەرى ءجيى-ءجيى دەزينفەكتسيالانادى. جولاۋشىلار ۇشاققا ءبىر-بىرىنەن قاشىق ورىنداردا, ياعني ارالارىنا 1 ورىندىق قالدىرىپ وتىرادى. ۇشاق بۇرىنعىداي تولى بولمايدى. بيلەتتەردىڭ 60 پايىزى عانا ساتىلماق, – دەدى د.ازىمباەۆ.
سپيكەرلەردىڭ ايتۋىنشا, ۇشاق بيلەتى قىمباتتاۋى مۇمكىن, ونىڭ باعاسىن ازاماتتىق اۆياتسيا كوميتەتى شەشەدى.