كۇشەيتىلگەن كارانتيندى ەلەمەيتىندەردىڭ ءبىرى كولىك رۋلىنە ماس كۇيىندە وتىرىپ, ءتارتىپ ساقشىلارىنىڭ نازارىنا ءىلىندى.
الكوگولدىك ىشىمدىكتى ىشكەنىمەن قويماي, 28 جاستاعى جۇرگىزۋشى 28 ساۋىردە «Opel-Astra» كولىگىمەن قالانى ارالاۋعا شىعىپتى. الايدا, قالا كوشەلەرىندە قالاعانىنشا قىدىرا المادى. سەبەبى, پوليتسيا قىزمەتكەرلەرى ونى تۇنگى ساعات 02:15 شاماسىندا ساتباەۆ-ۆلاديميرسكي كوشەلەرىنىڭ قيىلىسىندا توقتاتتى.
«تەكسەرۋ كەزىندە 1992 جىلى تۋعان ازاماتشانىڭ الكوگولدىك ىشىمدىك ىشكەنى بايقالىپ, مەديتسينالىق ساراپتاما تاعايىندالدى. دارىگەر-ناركولوگتىڭ قورىتىندىسىمەن جۇرگىزۋشىنىڭ ورتا دارەجەلى ماس ەكەنى انىقتالدى. وعان اكىمشىلىك قۇقىقبۇزۋشىلىق تۋرالى كودەكستىڭ 608-بابىنىڭ 1-بولىگىمەن جانە 476-باپپەن حاتتامالار تولتىرىلىپ, سوتقا جولداندى» -دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
سونداي-اق اتىراۋ قالاسىندا ءبىر تاۋلىكتە توتەنشە جاعداي رەجيمىن بۇزعان 50-گە جۋىق ادام ۇستالدى.