باتىس قازاقستان وبلىسىنىڭ جالپاقتال اۋىلىندا تۇراتىن جالعىزباستى انا گۇلشات نۇعمانوۆا «اسار» قايىرىمدىلىق ەستافەتاسىنىڭ ناتيجەسىندە باسپانالى بولدى. بۇل جونىندە وسى باستاماعا مۇرىندىق بولعان قازتالوۆتىق ارىپتەسىمىز جۇلدىز اسقاروۆا حابارلادى.
جازدىڭ اپتاپ ىستىعىندا, قىستىڭ سىقىرلاعان ايازىندا قۋىقتاي ءۇيدى پانالاپ جۇرگەن جالپاقتالدىق گۇلشات نۇعمانوۆانىڭ جاعدايىن كورگەن جەرگىلىكتى جۋرناليستەر وسىدان ەكى اي بۇرىن «اسار» قايىرىمدىلىق ەستافەتاسىن باستاعان ەدى. جالعىزباستى اناعا كومەك قولىن سوزعان قايىرىمدى جاندار از بولعان جوق. «حارەكەت» قايىرىمدىلىق قورى دا تىس قالماي, 700 مىڭ تەڭگە اۋداردى. وسىلايشا قاسيەتتى رامازان ايىندا قوس مۇگەدەك ۇلىن باعىپ وتىرعان جالعىزباستى انا 3 بولمەلى ۇيگە قول جەتكىزدى.
- ءبىز گۇلشات اپايعا الدىن الا ەشتەڭە ايتپاعان ەدىك. توسىنسىي بولدى. انا مەن بالالارىنىڭ قۋانىشىندا شەك جوق. بۇرىن قابىرعاسى قۇلاعان, شاعىن قۇجىرانى پانالاپ وتىرعان وتباسى جايناعان جاڭا ۇيگە كىرگەندە كوز جاسىنا يە بولا المادى, - دەيدى جۇلدىز.
اسار قايىرىمدىلىق ەستافەتاسىنا بارلىعى 1 314 707 تەڭگە تۇسكەن ەكەن. بۇل قارجىعا ۇيمەن قاتار, سۋ جاڭا گاز پليتاسى, توڭازىتقىش, ءاسۇي جيھازى, كىلەم, تەلەديدار, كيىم ىلەتىن شكاف الىنعان. قايىرىمدىلىق شاراسىنا جالپاقتال اۋىلىنىڭ 1990, 1991, 1992, 1996 جىلى تۋعان ازاماتتارىنىڭ ۇلەسى زور بولىپتى. وسى باستاماعا مۇرىندىق بولعان قازتالوۆ اۋداندىق گازەتىنىڭ رەداكتورى قايرات جاقىپ «حارەكەت» قايىرىمدىلىق قورىنىڭ وبلىستاعى وكىلى دەمەجان مەڭدەشوۆكە العىسحات تابىس ەتتى. باسپانالى بولعان گۇلشات اپاي وزىنە جاردەم بەرگەن بارشا ازاماتتارعا العىس ايتتى.
باتىس قازاقستان