تاراز قالاسىندا قۇرىلىس ارماتۋراسىن شىعارۋمەن اينالىساتىن تسەحتىڭ قۇرىلىس-مونتاج جۇمىستارى اياقتالىپ كەلەدى, دەپ حابارلادى يدم ءباسپاسوز قىزمەتى.
بۇگىنگى تاڭدا تەحنولوگيالىق جابدىقتار تولىعىمەن ساتىپ الىندى. بارلىق جابدىقتار كەدەننەن شىعارىلىپ, كاسىپورىن اۋماعىنا جەتكىزىلدى.
سونىمەن قاتار تەحنولوگيالىق جابدىقتاردى مونتاجداۋ جۇمىستارى جۇرگىزىلىپ جاتىر. بيىلعى ءىى توقساندا ىسكە قوسۋ جۇمىستارى اياقتالىپ, ءوندىرىس وشاعى جۇمىسىن باستاۋى ءتيىس.
ارماتۋرالىق تسەحتى پايدالانۋ كەزىندە 300-گە جۋىق ادام تۇراقتى جۇمىسپەن قامتاماسىز ەتىلىپ, ءوڭىر تۇرعىندارى ءۇشىن الەۋمەتتىك جۇكتەمەنى ءبىرشاما تومەندەتەدى.
جوبا قۇنى 1,8 ملرد. تەڭگە. جىلىنا 200 مىڭ توننا ءونىم شىعارۋ كوزدەلگەن. زاۋىت ءونىمى نەگىزىنەن ىشكى قۇرىلىس نارىعىنىڭ قاجەتتىلىگىن قامتاماسىز ەتەدى. قازىر ەلىمىزدە تۇرعىن ءۇي مەن الەۋمەتتىك نىساندار قۇرىلىسى بەلسەندى جۇرگىزىلىپ جاتقاندىقتان, زاۋىت ءونىمى جوعارى سۇرانىسقا يە بولۋى ءتيىس. سونداي-اق, وڭىردە بيزنەس نىساندار, جەكە تۇرعىن ءۇي قۇرىلىسى, جۇمىس ىستەپ تۇرعان ونەركاسىپتىك نىساندار مەن تسەحتاردى جاڭعىرتۋ جانە قايتا قۇرۋ جۇمىستارى قارقىندى ءجۇرىپ جاتىر.
جاقىن ارادا جوبانىڭ باستاماشىلارى تاعى ءبىر ماڭىزدى جوبانى قولعا الۋدى قاراستىرىپ وتىر. ول ءوز كەزەگىندە جامبىل وڭىرىندە قارا مەتاللۋرگيانىڭ دامۋىنا ايتارلىقتاي سەپتىگىن تيگىزەدى.