قاراعاندى قالاسىنداعى نازارباەۆ زياتكەرلىك مەكتەبىنىڭ بەس وقۋشىسى قازاقستاننىڭ ۇزدىك جوعارى وقۋ ورنىنا شاقىرتۋ الدى. ءبىلىم مەكەمەسىنىڭ 12-سىنىپ وقۋشىلارى ەراسىل تۇراروۆ, الىبەك ابەۋوۆ, ايتولقىن ءالجانوۆا, ەراسىل قادىرجانوۆ جانە انارا سەمبەكوۆا نازارباەۆ ۋنيۆەرسيتەتىنىڭ ءبىلىم گرانتىنا يە بولدى.
وزات وقۋشىنىڭ ءبىرى ەراسىل تۇراروۆ اتالعان ۋنيۆەرسيتەتتە مەحانيكالىق جانە اەروعارىشتىق ينجەنەريا ماماندىعى بويىنشا ءبىلىم الۋدى جوسپارلاپ ءجۇر. ول رەسپۋبليكالىق جانە حالىقارالىق روبوت تەحنيكاسى بويىنشا تۇرلى كونكۋرستارعا قاتىسىپ, جۇلدەلى ورىندارعا يە بولعان دارىندى جاس.
ەراسىل ءوزىنىڭ جاس كەزىنەن ماتەماتيكاعا, روبوت تەحنيكاسىنا, فيزيكا مەن ينفورماتيكاعا قىزىعۋشىلىعىنىڭ زور بولعانىن ايتادى.
– بولاشاقتا ءوزىمنىڭ ءومىرىمدى وسى سالالارمەن بايلانىستىرامىن. مەنىڭ قابىلەتىمدى بايقاپ, ونى دامىتۋعا ۇلەس قوسقان مەكتەبىمە, ۇستازدارىم مەن روبوت تەحنيكاسى كلۋبىنىڭ جەتەكشىلەرىنە العىسىمدى بىلدىرەمىن, – دەيدى ول.
سونداي-اق, گرانتقا يە بولعان تۇلەكتەر ىشىندە الىبەك ابەۋوۆ تاۋ-كەن ءىسى, ايتولقىن الجانوۆا حالىقارالىق قاتىناستار, ەراسىل قادىرجانوۆ كومپيۋتەر عىلىمدارىن, ال انارا سەمبەكوۆا مەديتسينا ماماندىقتارىن تاڭداعان.
ايتولقىن ءالجانوۆا اقش-تا FLEX باعدارلاماسى بويىنشا ءبىر جىل وقىپ كەلگەن سوڭ, ستۋدەنتتىك شاقتى قازاقستاندا, جاقىن ادامدارىنىڭ جانىندا وتكىزۋگە شەشىم قابىلداعانىن ايتادى.
– مەن بىرنەشە وقۋ ورنىمەن قاتار نازارباەۆ ۋنيۆەرسيتەتىنە دە قۇجات تاپسىرعان ەدىم. وقۋ ورنى جايلى ءبىراز اقپاراتقا قانىققان سوڭ, ءتورت جىلىمدى وسى ۋنيۆەرسيتەتتە وتكىزەمىن دەپ شەشتىم. نازارباەۆ ۋنيۆەرسيتەتى ماعان ءبىلىمدى, جارقىن جاندار جينالعان ۇلكەن وتباسى سياقتى كورىنەدى. سوندىقتان بەيىمدەلۋ پروتسەسى تەز, ءارى وڭاي وتەدى دەپ ويلايمىن. ۋنيۆەرسيتەتتىڭ جارقىن بولاشاققا جولىمدى اشىپ, ءوزىمدى دامىتۋىما كومەكتەسەتىنىنە سەنەمىن, – دەيدى تالاپتى جاس ايتولقىن ءالجانوۆا.
باعى جانعان قاراعاندىلىق بەس العاداي جاستىڭ وقۋعا ەرتە قابىلدانعان ابيتۋرەنتتەر قاتارىندا ەكەنىن ايتا كەتكەن ءجون.