باتىس قازاقستان وبلىسىندا بيىلعى ءۇش ايدا سىبايلاس جەمقورلىق فاكتىسى تۋرالى حابارلاعان نەمەسە سىبايلاس جەمقورلىققا قارسى كۇرەس شارالارىنا جاردەمدەسكەن ازاماتتاردى كوتەرمەلەۋ ءۇشىن 5 ادامعا 928 750 تەڭگە سىياقى تولەنگەن.
قازىر ەلىمىزدە سىبايلاس جەمقورلىقپەن كۇرەس ماسەلەسىندە بارلىق ءادىس-امال قولدانىلىپ جاتىر. سونىڭ ءبىرى – جەمقورلىق وقيعاسى تۋرالى حابارلاعان نەمەسە سىبايلاس جەمقورلىققا قارسى ءىس-قيمىلعا ءتۇرلى جولمەن جاردەم كورسەتكەن ازاماتتاردى كوتەرمەلەۋ.
-بيىلعى ءبرىنشى توقساندا 5 ازامات قارجىلاي كوتەرمەلەۋگە يە بولدى. ونىڭ ۇشەۋى ىشكى ىستەر ورگاندارىندا سىبايلاس جەمقورلىق فاكتىسى تۋرالى حابارلاسا, قالعان ەكەۋى – كۆازيمەملەكەتتىك سەكتورداعى زاڭ بۇزۋشىلىقتى اشكەرەلەپ بەرگەن, - دەيدى باتىس قازاقستان وبلىسى بويىنشا سىبايلاس جەمقورلىققا قارسى قىزمەتىنىڭ ءباسپاسوز قىزمەتى.
سىبايلاس جەمقورلىققا قارسى كۇرەسكە ۇلەس قوساتىن بەلسەندى ازاماتتاردى كوتەرمەلەۋ ەلىمىزدە 2015 جىلدىڭ سوڭىندا قابىلدانعان ۇكىمەت قاۋلىسىنا سايكەس جۇرگىزىلىپ كەلەدى. مىسالى, سىبايلاس جەمقورلىق قۇقىق بۇزۋشىلىقتار تۋرالى اكىمشىلىك ىستەر بويىنشا – 30 ايلىق ەسەپتىك كورسەتكىش كولەمىنەن باستالاتىن سىياقى مولشەرى اسا اۋىر سىبايلاس جەمقورلىق قىلمىستار تۋرالى قىلمىستىق ىستەر بويىنشا دەرەك بەرگەن ازاماتتارعا - 100 ايلىق ەسەپتىك كورسەتكىشكە دەيىن وسەدى. ال پارا نەمەسە كەلتىرىلگەن زالال سوماسى ءبىر مىڭ اەك-تەن اساتىن قىلمىستار بويىنشا بىرجولعى اقشالاي سىياقى كەلتىرىلگەن زالالدىڭ ون پايىزىن قۇرايدى.
باتىس قازاقستان